Azərbaycan Tibb Universitetinin (ATU) Sitologiya, embriologiya və histologiya kafedrasının müdiri, professor Eldar Qasımov və Elmi Araşdırmalar Mərkəzinin Elektron Mikroskopiya şöbəsinin müdiri, dosent Fuad Rzayevin “Xroniki yüksək səs-küyün təsirindən siçovulun beyninin eşitmə və limbik bölgələrində baş verən biokimyəvi və ultrastruktur dəyişikliklər” adlı məqaləsi “BioMed Research International” jurnalında (WoS, Scopus, Q1-2, IF-2.3) nəşr olunub.

Azərbaycan Tibb Universitetindən Aztibb.az-a bildirilib ki, Sitologiya, embriologiya və histologiya kafedrasının müdiri, professor Eldar Qasımov və Elmi Araşdırmalar Mərkəzinin Elektron Mikroskopiya şöbəsinin müdiri, dosent Fuad Rzayevin “Xroniki yüksək səs-küyün təsirindən siçovulun beyninin eşitmə və limbik bölgələrində baş verən biokimyəvi və ultrastruktur dəyişikliklər” adlı məqaləsi “BioMed Research International” jurnalında (WoS, Scopus, Q1-2, IF-2.3) nəşr olunub.
Tədqiqat işi Gürcüstan alimləri ilə (İlia Dövlət Universiteti, New Vision Universiteti, İvane Beritaşvili adına Eksperimental Biotibb Mərkəzi) birgə yerinə yetirilib. Məqalədə eksperimental şəraitdə 30 gün ərzində yüksək səs-küyün yetkin erkək siçovulların beyin qabığının klassik eşitmə (aşağı qoşatəpənin mərkəzi nüvəsində) və limbik bölmələrində (badamcığın bazolateral hissəsində və hippokampda) nəzərəçarpacaq biokimyəvi və ultrastruktur dəyişikliklərə səbəb olması haqqında məlumat verilir. Məlum olub ki, bölgədən asılı olaraq, sinaptik vezikulların, inflammasomların və mitoxondrial oksidləşdirici fosforlaşma sisteminin zülal komponentlərində əhəmiyyətli dəyişikliklər müşahidə edilir. Eksperimental şəraitdə nəzarət qrupu ilə müqayisədə beynin klassik eşitmə və limbik bölgələrində aşkar edilən biokimyəvi və morfoloji pozğunluqların qarşılıqlı əlaqəli olduğu dəqiqləşdirilib.