Ümumdünya Səhiyyə Təşkilatı (ÜST) həkimlərin kütləvi şəkildə koronavirusa yoluxması ilə bağlı narahatlığını bildirib. Bəzi ölkələrdə tibb işçilərinin 10%-i koronavirusa yoluxub.

Aztibb.az bildirir ki, bu haqda ÜST-nin Baş direktoru Tedros Gebreisus məlumat verib. Dünyada onlarla cavan və sağlam həkim və tibb işçisi koronavirusdan vəfat edib. Azərbaycanda isə bu günə qədər koronavirusdan 26 həkim vəfat edib. Bununla qoruyucu kostyumlar, xüsusi maska və eynəklərin koronavirusdan qoruyub-qorumadığı ilə bağlı suallar ortaya çıxır. 

Dünya alimləri belə nəticəyə gəliblər ki, koronavirusdan ölüm riskini artıran əsas səbəblərindən biri virus yüklənməsidir. Başqa sözlə, orqanizmə nə qədər çox virus hissəcikləri düşərsə, bu bir o qədər təhlükəlidir. Bu zaman immun sistemi virusu tez və effektli şəkildə dəf edə bilmir və xəstəlik inkişaf edir, ağırlaşmalar baş verir.

Məhz bu səbəbdən bütün dünyada koronavirus xəstələri ilə işləyən həkimlər və tibbi personal arasında yoluxma və ölüm hallarına tez-tez rast gəlinir.

Xüsusilə reanimasiyada işləyən tibbi personal yoluxma riski ilə üz-üzədir. Süni tənəffüs aparatları işləyəndə havaya milyonlarla virus hissəciklərini buraxır və onlar dərhal səthlərə düşmür, havada qalır. Nəticədə saatlarla qapalı şəraitdə işləyən tibbi personal çox ciddi virus hücumuna məruz qalır və təəssüf ki, bu zaman ən yaxşı qoruyucu kostyumlar, maskalar və s. vasitələr də yoluxmadan tam qoruya bilmir.