Laçın Rayon Mərkəzi Xəstəxanasının həkim-mütəxəssisləri tərəfindən mövsümi olaraq Laçın rayonunun Ağbulaq, Şeylanlı, Qarakeçdi kəndlərinə və yaylaqlara köçən fermerlərin səyyar tibbi müayinəsi təşkil edilib.

Bu barədə Aztibb.az-a Xəstəxanadan məlumat verilib.

Bildirilib ki, terapevt, endokrinoloq, pediatr, dermatoloq, infeksionist, ultrasəs müayinə, laborant ixtisasları üzrə həkimlərdən ibarət briqada tərəfindən aparılan müayinələrə 16-sı uşaq, 58-i isə 18 yaşdan yuxarı olmaqla ümumilikdə 74 nəfər cəlb olunub. Onlara 168 adda tibbi xidmət göstərilib.

Səyyar tibbi müayinələr ucqarlarda keyfiyyətli tibbi xidmətlərə əlçatanlığın artırılması və xəstəliklərin erkən diaqnostikasının təmin edilməsi məqsədi ilə həyata keçirilir.