TƏBİB ahıl və həssas qruplara daxil olan şəxslərin, uşaq, hamilə və zahı qadınların yerində müşahidəsini aparmaq, tibbi xidmətlərə əlçatanlığı təmin etmək, o cümlədən icbari tibbi sığortanın yaratdığı imkanlar çərçivəsində təqdim olunan xidmətlərlə bağlı maarifləndirmə işinin gücləndirilməsinə dəstək məqsədilə kənd yerlərində tibbi müayinə tədbirlərini davam etdirir.

Xaçmaz Rayon Mərkəzi Xəstəxanasının ixtisaslı həkim heyətinin iştirakı ilə "Sağlam gələcək" devizi altında Çaykənarı kəndinin sakinlərinin tibbi müayinəsi həyata keçirilib.

Bu barədə Aztibb.az-a Xəstəxanadan məlumat verilib.

Bildirilib ki, tibb müəssisəsinin müxtəlif ixtisaslı həkimləri (terapevt, pediatr, ginekoloq, kardioloq, laborant və s.) tərəfindən icbari tibbi sığorta çərçivəsində 50-yə yaxın kənd sakininə (uşaqlar və böyüklər olmaqla) 70-dək tibbi xidmət göstərilib.

Müayinələr zamanı ixtisaslı tibbi xidmətlərə ehtiyac yarandığı təqdirdə sakinlərin aidiyyəti üzrə tibb müəssisələrinə yönləndirilməsi təmin edilib.