Bakı Baş Səhiyyə Mərkəzinin strukturuna daxil olan 5 nömrəli Vərəm Əleyhinə Dispanserin baş həkimi Abbasova Səidə Həbib qızı təqaüdə yola salınıb.

Bu barədə Aztibb.az-a Mərkəzdən bildirilib.

Tədbirdə çıxış edən Mərkəzin direktor müavini Güllü İbadova Səidə Abbasovaya 40 ildən artıq olan baş həkimlik fəaliyyətində hər zaman əhalinin sağlamlığının qorunması istiqamətindəki yorulmaz xidmətlərinə görə minnətdarlığını bildirib.

5 nömrəli Vərəm Əleyhinə Dispanserin baş həkimi Səidə Abbasova göstərilən diqqətə görə Bakı Baş Səhiyyə Mərkəzinin rəhbərliyinə təşəkkür edib.

Tədbirin sonunda Səidə Abbasova Bakı Baş Səhiyyə Mərkəzinin direktoru Elçin Əmirov adından səhiyyə sahəsində uzunmüddətli və səmərəli fəaliyyətinə görə təşəkkürnamə ilə təltif edib.

Qeyd edək ki, Abbasova Səidə Həbib qızı 08.02.1950-ci ildə Bakı şəhərində anadan olub. 1957-ci ildə Bakı şəhərində yerləşən 134 nömrəli tam orta məktəbdə təhsil alıb. 1967-ci ildə orta məktəbi bitirib. Həmin il Azərbaycan Tibb Universitetinin pediatriya fakültəsinə daxil olub.

1973-1974-cü illər ərzində Əfəndiyev adına 2 nömrəli Klinik Xəstəxananın Pediatriya şöbəsində internatura keçib.

1975-ci ildən Nərimanov rayonunda yerləşən 14 nömrəli Uşaq Poliklinikasına həkim-pediatr vəzifəsinə təyinat alıb. 1979-cu ilə qədər həmin müəssisədə sahə pediatrı vəzifəsində çalışıb.

1979-cu ildə Bakı şəhəri Nərimanov rayonu üzrə Səhiyyə şöbəsinə rayon pediatrı vəzifəsinə təyin olunub.

1983-cü ildə 5 nömrəli Vərəm Əleyhinə Dispanserin baş həkimi vəzifəsinə təyin olunub. Həmin ildən 08.02.2024-cü ilə qədər isə həmin tibb müəssisəsində baş həkim vəzifəsində fəaliyyət göstərib.

2014-cü ildə Azərbaycan Respublikası Prezidentinin müvafiq Sərəncamı ilə “Tərəqqi” medalı ilə təltif edilib.