Ümummilli Lider Heydər Əliyevin 100 illik yubileyinə həsr olunmuş "GINius" intellektual yarışının ölkə finalı keçirilib. Yarışa regionlar və Bakı üzrə seçim turlarında uğurlu nəticə göstərmiş qalib komandalar qatılıb.
Azərbaycan Tibb Universitetindən (ATU) Aztibb.az-a verilən xəbərə görə, "Fibonacci Games" tərəfindən aparılan yarışda 36 komanda 7 tur boyunca müxtəlif mövzular üzrə bilik mübarizəsi aparıblar. Bakı Gənclər Evində seçim mərhələsini keçmiş ATU-nun Tələbə Həmkarlar İttifaqı Komitəsi İntellektual Oyunlar Klubunun üzvlərindən ibarət “Sinaps” komandası ən çox xal toplayaraq birinci olub.
Universiteti təmsil edən gənclər I Müalicə-Profilaktika fakültəsi V kurs tələbəsi Arzu Musayeva, II Müalicə-Profilaktika fakültəsi VI kurs tələbəsi Fərid Məmmədhüseynov, İctimai Səhiyyə fakültəsi IV kurs tələbəsi Cavid Əhmədov və Stomatologiya fakültəsi III kurs tələbəsi Mirleyla Ağayeva olub.
Qaliblərə mükafatları gənclər və idman naziri Fərid Qayıbov və ADBTİA-nın rektoru Fuad Hacıyev təqdim ediblər.
Qeyd edək ki, yarışın start götürdüyü iki ay ərzində ümumilikdə 157 komandada 1000-dək gənc iştirak edib.