Quba Rayon Mərkəzi Xəstəxanasının səyyar həkim briqadası tərəfindən uşaqların icbari dispanserizasiyası prosesi çərçivəsində Zərdabi qəsəbəsində yerləşən valideyn himayəsindən məhrum olan uşaqlar üçün tam orta internat məktəbində tibbi müayinələr aparılıb.

Aztibb.az TƏBİB-in rəsmi feysbuk səhifəsinə istinadla xəbər verir ki, uşaqların sağlamlığının qorunması, onlar arasında xəstəliklərin vaxtında aşkar edilməsi məqsədi ilə cərrah, nevroloq, stomatoloq, oftalmoloq, otorinolarinqoloq, pediatr, ginekoloq, dermatoloqun müayinələri keçirilib, uşaqlardan qan analizləri götürülüb və müvafiq müalicələr təyin olunub.

Qeyd edək ki, Azərbaycan Respublikasının Nazirlər Kabinetinin 2014-cü il 23 aprel 109 nömrəli Qərarı ilə təsdiq edilmiş "Uşaqların icbari dispanserizasiyasının həyata keçirilməsi qaydaları"nın 3.4 bəndinə əsasən valideynlərini itirmiş və valideyn himayəsindən məhrum olmuş uşaqların təhsil və ya tərbiyə aldığı müəssisələrdə, ailə tipli uşaq evlərində, eləcə də əhalinin sosial müdafiəsi müəssisələrində onların icbari dispanserizasiyası səhiyyə müəssisələri tərəfindən yaradılmış səyyar briqadalar tərəfindən həyata keçirilir.