O, 1948-ci ildə Naxçıvan Muxtar Respublikasının Ordubad rayonunun Biləv kəndində anadan olub. Azərbaycan Tibb Universitetini bitirib.

 

Yavər Şıxəliyev 1972-ci ildə Naxçıvan Respublika Onkoloji Dispanserində şöbə müdiri vəzifəsində işləyib. 1973-cü ildən Naxçıvan Respublika Vərəm Əleyhinə Dispanserinə Baş həkim təyin olunub. 1986-cı ildə Naxçıvan şəhər Səhiyyə şöbəsində müdir, 1989-cu ildə Azərbaycan Elmi-Tədqiqat Ağciyər Xəstəlikləri İnstitutunda Elmi-təşkilat şöbəsində müdir vəzifələrində çalışıb.

 

Azərbaycan Tibb Universitetinin “Ağciyər xəstəlikləri” kafedrasının və Ə.Əliyev adına Azərbaycan Həkimləri Təkmilləşdirmə İnstitutunun “Ftiziatriya” kafedrasının professorudur. Azərbaycan Prezidenti yanında AAK-nın tibb üzrə ekspert şurasının üzvüdür.

 

Bakı şəhərində vərəmin epidemioloji vəziyyətinin gərginliyi nəzərə alınaraq Yavər Şıxəliyev 1993-cü ildə Bakı şəhərinin Mərkəzi Vərəm Dispanserinə baş həkim vəzifəsinə keçirilib. Fəaliyyəti dövründə respublikada vərəm əleyhinə tədbirlərin həyata keçirilməsində və bu sahədə bir sıra problemlərin həlli istiqamətində mühüm elmi-praktiki işlər həyata keçirib:

- ilk dəfə olaraq respublikada vərəmin epidemiologiyasını gərginləşdirən vərəm residivlərinin qarşısının alınması məqsədi ilə A.Valdın ardıcıl riyazi-statistik proqnozlaşdırma metodundan istifadə edərək vərəm əleyhinə müəssisələr üçün risk qruplarının xarakteristikasını verib;

- ilk dəfə olaraq respublikada vərəmin epidemiologiyasının klimatik, coğrafi, ekoloji amillərdən asılılığını göstərərək xəstəliyin yayılmasının coğrafi xəritəsini tərtib edib;

- ilk dəfə respublikada vərəmin erkən aşkarı istiqamətində profilaktik flüoroqrafiyanın təşkilinin xüsusiyyətlərini öyrənərək praktik ftiziatriyaya tətbiq etməklə müvafiq tövsiyələr verib;

- ilk dəfə olaraq ölkədə vərəmin epidemioloji vəziyyətinə qiymət vermək üçün hesabat forması və epidemioloji göstəricilərin təyini metodlarını hazırlayıb və s.

- ilk dəfə olaraq vərəmin passiv aşkarlanmasının effektliyinin yüksəldilməsi istiqamətində yoluxucu vərəm xəstələrinin, xüsusən spesifik dərmanlara davamlı formaların erkən aşkarı üçün risk qruplarını təyin edib;

Yazdığı bir sıra metodik tövsiyələr Azərbaycan Respublikası Səhiyyə Nazirliyinin Elmi-tibbi şurası tərəfindən təsdiq edilib.

 

Yavər Şıxəliyevin ftiziatrlar, ftiziopediatrlar, həkim-rentgenoloqlar və Gigiyena-Epidemiologiya Mərkəzinin əməkdaşları üçün mühüm elmi-praktiki əhəmiyyətə malik olan üç monoqrafiya, bir dərs vəsaiti və bir dərsliyi dərc olunub

Yerli və xarici tibb ədəbiyyatlarında 200-dən çox elmi məqalələri var.

 

Onun ictimai fəaliyyətinə Bakı şəhərinin baş ftiziatrı, Mərkəzi Həkim Məsləhət Komissiyasının sədri, Ftiziatriya ixtisası üzrə Sertifikasiya Komissiyasının sədri, Respublika üzrə spesifik dərmanlara davamlı xəstələrin müalicəsinə nəzarət komissiyasının sədri və s. vəzifələr daxildir.

 

Həkim işlədiyi müddətdə respublikada, o cümlədən Bakı şəhərində vərəmin epidemik stabilliyi istiqamətində gördüyü işlərə və qüsursuz fəaliyyətə görə dəfələrlə Azərbaycan, Naxçıvan Səhiyyə Nazirliyinin Fəxri fərmanları ilə təltif olunub.

 

2015-ci ildə Azərbaycan Respublikası Prezidentinin fərmanı ilə “Əməkdar həkim” fəxri adına layiq görülüb.