TƏBİB-in tabeliyində fəaliyyət göstərən Yeni Klinika ilə Koreya Ticarət və İnvestisiyaların Təşviqi Agentliyi (Korea Trade-Investment Promotion Agency – KOTRA) arasında görüş keçirilib.

Bu məlumat Aztibb.az-a Yeni Klinikadan verilib.

Beynəlxalq əməkdaşlıq çərçivəsində təşkil olunan görüşdə Yeni Klinikanın direktoru Barat Yusubov, KOTRA-nın Azərbaycan üzrə Baş direktoru cənab Kyekvon Co, direktor müavini, Cərrahiyyə və transplantasiya mərkəzinin rəhbəri Eldar Əhmədov, TƏBİB-in icraçı direktorunun müşaviri, Yeni Klinikanın İdarə Heyətinin üzvü Pərvin Əkbərov, inzibati işlər üzrə direktor müavini İlqar Mustafayev və digərləri iştirak ediblər.

Tibbi istiqamətlər üzrə əməkdaşlıq müzakirələrinin aparıldığı görüşdə Barat Yusubov klinikanın fəaliyyət istiqaməti və hədəfləri ilə bağlı məlumat verib. Azərbaycan-Koreya münasibətlərinin müxtəlif istiqamətlərdə daha da inkişaf etdirilməsi üçün addımlar atıldığını vurğulayan direktor bu münasibətlərin tibbi istiqamətdə də davam etdirməyə hazır olduqlarını bildirib.

Klinika ilə yaxından tanış olan Kyekvon Co Cənab Prezident İlham Əliyevin rəhbərliyi ilə aparılan sosial siyasəti, ölkədə baş verən inkişaf proseslərini və qazanılan nailiyyətləri yüksək qiymətləndirərək Azərbaycanla beynəlxalq əməkdaşlığın önəmli olduğunu qeyd edib.

Səmimi keçən görüş çərçivəsində Kyekvon Co bir neçə ay əvvəl səhhətində baş verən problemlə bağlı Azərbaycanda olan tibb müəssisəsələrindən birinə müraciət etdiyini, peşəkar həkimlər tərəfindən müayinə və müalicə olunduğunu bildirib. Baş direktor göstərilən tibbi xidmətdən çox razı qaldığını, ona təyin edilən müalicəni koreyalı həkimlərlə də bölüşdüyünü qeyd edib.

Sonda Kyekvon Co klinika ilə yaxından tanış olmaq üçün Təcili və təxirəsalınmaz tibbi yardım, Radiologiya, Pediatriya və s. şöbələrlə tanış olub.