Səhiyyə nazirliyinin baş anestezioloq-reanimatoloqu, Azərbaycan Tibb Universitetinin Anesteziologiya və reanimatologiya kafedrasının dosenti, II Müalicə-profılaktika fakültəsinin dekanı, Tədris Cərrahiyyə Klinikasında "Ağırlaşma və ölüm hallarının araşdırılması" komissiyasının sədri İsrail Məhərrəmbəylinin 60 yaşı tamam olub.

Aztibb.az xəbər verir ki, İsrail Məhərrəmbəyli 1963-cü il noyabr ayının 4-də Tovuz rayonunun Düz Qırıxlı kəndində anadan olub. 1986-cı ildə N.Nərimanov adına Azərbaycan Tibb Universitetinə qəbul olub, 1992-ci ildə I Müalicə-profilaktika fakültəsini fərqlənmə diplomu ilə bitirib. Həmin il universitetin Elmi Şurasının qərarı ilə Anesteziologiya-reanimatologiya kafedrasında baş laborant vəzifəsinə saxlanılıb. O, 1995-ci ildə həmin kafedranın assistenti, 2008-ci ildən kafedrada dosent vəzifəsində çalışır.

İsrail Məhərrəmbəyli 2000-ci ildə "Yayılmış irinli peritonitli xəstələrdə immun sistemin göstəricilərinin proqnostik əhəmiyyəti və korreksiyası" mövzusunda dissertasiya işini müdafiə edərək tibb elmləri namizədi elmi dərəcəsini alıb. O, 80-ə yaxın elmi işin, 2 metodik vəsaitin müəllifi, "Reanimatologiya" dərsliyinin həmmüəllifidir. 2011-2016-cı illərdə I Müalicə-profilaktika fakültəsinin Həmkarlar Təşkilatının sədri işləyib, 2016-cı ilin dekabr ayından II Müalicə-profilaktika fakültəsinin dekanı vəzifəsinə seçilib.

İsrail Məhərrəmbəylini 60 illik yubileyi münasibətilə ürəkdən təbrik edir, ona möhkəm cansağlığı, uzun ömür, yorulmaz fəaliyyətində uğurlar arzulayırıq.