TƏBİB-in dəstəyilə "Medinex" sərgisinin tədbirlər proqramı çərçivəsində “Pediatriyada aktual mövzular” adlı panel müzakirəsi keçirilib.
Aztibb.az-ın məlumatına görə, panel sessiyasında Azərbaycan Pediatriya Cəmiyyətinin sədri, tibb üzrə fəlsəfə doktoru, uzman pediatr Erkin Rəhimov, Akademik M.Ə.Mirqasımov adına Respublika Klinik Xəstəxanasının direktor müavini Rəşad Tağıyev, “Nəfəs” Psixonevroloji Sağlamlıq Mərkəzinin uzman psixiatrı İkram Rüstəmov təqdimatlarla çıxış ediblər.
Erkin Rəhimov “Yenidoğulmuşlarda təhlükə işarələri” mövzusundakı çıxışında neonatal dövr haqqında ümumi danışıb. E.Rəhimov Ümumdünya Səhiyyə Təşkilatına (ÜST) görə yenidoğulmuşlarda təhlükə işarələrindən bəhs edib, fotolar vasitəsilə rast gəlinə bilən hallar üzrə iştirakçıları məlumatlandırıb.
Rəşad Tağıyev “Hərarətdən qorxaqmı?” mövzusunda çıxış edərək uşaqlarda yüksək hərarətin tərifi və müalicəsi haqqında məlumat verib. O, çıxışında yüksək hərarət, bədən hərarətinin ölçülmə qaydası, yüksək hərarət zamanı diqqət edilməli məqamlar, hərarətin faydaları və zərərləri, etiologiya, anamnez mövzuları barədə danışıb, yüksək hərarət zamanı müalicə üçün tövsiyələrini bildirib.
İkram Rüstəmov “Müxtəlif autizm spektorlu uşaqlar” mövzusundakı çıxışında bildirib ki, autistik spektr pozuntularının inkişafla əlaqəli ünsiyyətin və davranış pozuntularının olduğu , geniş simptom çeşidliliyi göstərən bir xəstəliklər qrupudur. İ.Rüstəmov autizmin diaqnozu, epidemiologiyası, genetik səbəbləri, mühitlə əlaqəli təsirləri barədə iştirakçıları məlumatlandırıb.
Sonda iştirakçıların sualları cavablandırılıb, fikir mübadiləsi aparılıb.