Naxçıvan Muxtar Respublikası Səhiyyə nazirinin birinci müavini, nazir vəzifələrini icra edən Samiq Sadıxov İzmir Katip Çələbi Universitetinin rektoru, prof. Saffet Köse ilə görüşüb.
Aztibb.az-a Naxçıvan Səhiyyə Nazirliyindən bildirilib ki, görüşdən məmnunluğunu ifadə edən Samiq Sadıxov səfərin ikitərəfli əməkdaşlığa səbəb olmasını arzuladığını bildirib. İKÇU-nin səhiyyə sahəsindəki bilik və təcrübəsindən yararlanmaq istədiklərini bildirən Samiq Sadıxov qeyd edib ki, universitetin səhiyyə sahəsində çalışan professorlarının təcrübələri Naxçıvan səhiyyəsi üçün çox faydalı olacaqdır.
“İKÇU ilə həkimdən tibb bacısına qədər səhiyyə sistemimizdəki bütün səhiyyə işçilərini əhatə edəcək bir mübadilə proqramı təşkil etməyi istəyirik. Biz bununla bağlı istənilən əməkdaşlığı və birgə mübadilə proqramını reallaşdırmaq niyyətindəyik”, - deyə Samiq Sadıxov vurğulayıb.
Prof. Saffet Köse qardaş dövlətlər olaraq aralarındakı əlaqələrin gücləndirilməsi üçün hər cür töhfə verməyə hazır olduqlarını söyləyib.
Görüş əməkdaşlıq sahələrinin müzakirəsi ilə başa çatıb.