Salyan Rayon Mərkəzi Xəstəxanasında cənub regionunda ilk dəfə olaraq qapalı travmatoloji əməliyyat icra olunub.

TƏBİB-dən Aztibb.az-a verilən xəbərə görə, tibb müəssisəsinə müraciət edən 1961-ci il təvəllüdlü pasiyentə sağ bud sümüyünün aşağı 1/3-nin qapalı yerdəyişən sınığı diaqnozu qoyulub. Zəruri tibbi xidmətlər göstərilən pasiyentin üzərində qapalı travmatoloji əməliyyat - anteqrad üsulla bud sümüyünün kilidli çivi ilə intramedulyar (sümük iliyi daxili) osteosintezi əməliyyatı icra olunub.

Əməliyyat uğurla nəticələnib və pasiyent 48 saat müşahidə altında saxlanıldıqdan sonra xüsusi hərəkət məhdudlaşdırıcıları, gips və s. olmadan ambulator müalicə üçün evə buraxılıb.

Qeyd edək ki, Salyan Rayon Mərkəzi Xəstəxanası müasir - elektron optik görüntüləmə cihazı, travmatoloji əməliyyat alətləri ilə təmin olunub. Bununla da tibb müəssisəsində yeni avadanlıqlarla icra oluna bilən mürəkkəb əməliyyatlara start verilib.