Dövlət Gömrük Komitəsinin Tibbi Xidmət İdarəsi və Səhiyyə Nazirliyi 1 nömrəli Bakı Tibb Kolleci arasında əməkdaşlıq memorandumu imzalanıb.

Mərkəzi Gömrük Hospitalından Aztibb.az-a verilən xəbərə görə, memorandumu Dövlət Gömrük Komitəsinin Tibbi Xidmət İdarəsinin rəisi Ceyhun Məmmədov və 1 nömrəli Bakı Tibb Kollecinin direktoru Nailə Əliyeva imzalayıblar.

Sənədə əsasən 1 nömrəli Bakı Tibb Kollecinin orta tibb işçilərinin peşə vərdişlərinə daha yaxşı yiyələnməsi üçün Mərkəzi Gömrük Hospitalında təlimlərin keçirilməsi, birgə sertifikatlaşdırılmış tibbi təlim kurslarının və elmi-təcrübi konfransların keçirilməsi, tədqiqatlarla bağlı birgə layihələrin işlənilməsi, müştərək seminar, ümumi konfrans, simpozium, o cümlədən sosial, xeyriyyə və maarifləndirici tədbirlərin keçirilməsi nəzərdə tutulub. 

Qeyd edək ki, Dövlət Gömrük Komitəsinin Tibbi Xidmət İdarəsi Mərkəzi Gömrük Hospitalı yerli və beynəlxalq təşkilatlarla əməkdaşlıq imkanlarını mütəmadi olaraq genişləndirməkdədir.