Azərbaycan Tibb Universiteti (ATU) ilə Yeditepe Universiteti arasında əməkdaşlıq memorandumu imzalanıb.
ATU-dan Aztibb.az-a verilən məlumata görə, universitetin rektoru, professor Gəray Gəraybəyli Türkiyənin Yeditepe Universitetinin Tibb fakültəsinin dekanı, professor Sina Ercanla görüşdə ölkəmizdə keçirilən beynəlxalq konfransa qatıldığı üçün qonağa təşəkkürünü bildirib, Avropa Akkreditasiya Təşkilatı tərəfindən konfransın 24,5 balla akkreditə olunmasını təşkilatçıların fəaliyyətinə verilən yüksək qiymət kimi dəyərləndirib.
Professor G.Gəraybəyli əsas diqqəti Türkiyə universitetləri ilə olan əməkdaşlığın səviyyəsinə yönəldib. Rektor qeyd edib ki, ATU-nun 30-dan çox tibb fakültəsi ilə əlaqələri var. Bu əlaqələr təkcə sənəd üzərində deyil, praktiki fəaliyyətdə təsdiqini tapan qardaşlıq münasibətləridir. Hazırda Tibb bacılığı ixtisası üzrə təhsil alan bir neçə tələbəmiz praktiki bacarıqlarını təkmilləşdirmək üçün Türkiyədədir.
Professor Sina Ercan səmimi qəbul üçün ATU-nun rektoru, professor G. Gəraybəyliyə təşəkkürünü bildirib. O, bu əlaqələrin Yeditepe Universiteti üçün də əhəmiyyətli olduğunu deyib.
Görüş zamanı ikili diplom və digər məsələlərə dair fikir mübadiləsi aparılıb. Eyni zamanda, gələcək planlarla bağlı təkliflər səsləndirilib.
Görüşün sonunda ATU ilə Yeditepe Universiteti arasında əməkdaşlıq memorandumu imzalanıb. Memorandumda iki universitet arasında tələbə-müəllim mübadiləsi, birgə layihələrin icrası, ikili diplom məsələsində əməkdaşlıq və digər önəmli məqamlar nəzərdə tutulub.