TƏBİB-in tabeliyindəki Gəncə Şəhər Birləşmiş Xəstəxanasında (ŞBX) ilk dəfə olaraq laparoskopik xolesistektomiya (öd kisəsinin çıxarılması) əməliyyatı icra edilib.

Gəncə ŞBX-dan Aztibb.az-a bildirilib ki, tibb müəssisəsinin nəzdində olan Abbas Səhhət adına xəstəxanada baş tutan əməliyyatı uzman anestezioloq-reanimatoloq Elşad Abışov, ümumi cərrahlar Anar Məmmədov, Nazilə Balakişiyeva və Rəşid Həsənov icra ediblər.

Əməliyyat prosesi uğurla başa çatıb, xəstə əməliyyatdan sonra özünü yaxşı hiss edir.

Qeyd edək ki, Gəncə Şəhər Birləşmiş Xəstəxanasının müasir avadanlıq və cihazlarla təchiz edilməsi prosesi mütəmadi davam etdirilir.

Laparoskopik xolesistektomiya əməliyyatının icra edildiyi “Karl Storz” laparoskopik cihazı ən müasir tələblərə cavab verir.

Laparoskopik metodla aparılan əməliyyatlarda videokameranın köməyindən, nazik alətlərdən istifadə edilir və bu cür əməliyyatların üstünlüyü odur ki, ənənəvi cərrahi üsullardan fərqli olaraq daha kiçik ölçülü kəsiklər açılır, nəticədə pasiyentin reabilitasiya dövrü daha sürətli və asan olur. Optik cihazın kəsik yolu ilə əməliyyat sahəsinə daxil olması cərraha həmin nahiyəni monitorda rahatlıqla görməyə imkan verir. Laparoskopik əməliyyatlar daha az travmalı olduğundan ağırlaşma olmadıqda pasiyent növbəti gün evə yazılır. Bundan əlavə, əməliyyatdan sonra bədəndə kobud kəsik və çapıq izləri qalmır.