Vaxtından əvvəl doğuş təhlükəsi ilə Səhiyyə Nazirliyi Elmi-Tədqiqat Mamalıq və Ginekologiya İnstitutuna müraciət edən pasiyent 18 il sonsuzluq sonrası əkiz övladlarını sağlam şəkildə dünyaya gətirib.
Bu barədə Aztibb.az-a İnstitutdan məlumat verilib.
Hamiləliyin təxminən 28-ci həftəsində vaxtından əvvəl doğuş təhlükəsi, istmiko-servikal çatışmazlıq diaqnozları ilə ETMGİ-yə gələn hamilə Qəbul şöbəsindən təcili şəkildə həkim mama-ginekoloq Aysel Bəyişovanın nəzarəti altında Hamiləliyin patologiyası şöbəsinə köçürülüb. İstmiko-servikal çatışmazlıq konservativ üsullarla korreksiya olunduqdan sonra qadın dinamik nəzarətdə saxlanılıb və hamiləlik 37-ci həftəyə qədər çatdırılıb. Vəziyyəti ilə əlaqədar mama-ginekoloq A.Bəyişova tərəfindən cərrahi doğuş aparılıb.
Uğurla keçən qeysəriyyə kəsiyi əməliyyatı ilə hər ikisi oğlan olan 2400 və 2700 qram çəkidə əkizlər sağlam şəkildə dünyaya gəlib.
Qadın övladları ilə birlikdə evə yola salınıb.
