Tibbi Ərazi Bölmələrini İdarəetmə Birliyinin (TƏBİB) nümayəndələri ECDC-nin (European Centre for Disease Prevention and Control - Avropa Xəstəliklərin Qarşısının Alınması və Nəzarəti Mərkəzi) təşkil etdiyi Sloveniya/Azərbaycan mütəxəssislərinin AMR/MDR (antibiotiklərə davamlılıq/çoxlu dərmanlara davamlılıq) nəzarət mövzusu üzrə mübadilə proqramında iştirak ediblər.
Bu barədə Aztibb.az TƏBİB-in rəsmi feysbuk səhifəsinə istinadla bildirir.
Azərbaycan nümayəndə heyətini TƏBİB-in Tibbi xidmətlərin inkişafı departamentinin rəhbəri Yaqut Qarayeva, TƏBİB-in Yoluxucu xəstəliklər və infeksion nəzarətin təşkili şöbəsinin müdiri Nəzrin Mustafayeva, Yeni Klinikanın həkim-mikrobioloqu Mətanət Məmmədova, Neftçilər Xəstəxanasının həkim-mikrobioloqu Lalə Baxışlı və Kliniki Tibbi Mərkəzin həkim-mikrobioloqu Lalə Vəliyeva təmsil ediblər.
Tədbir Sloveniyanın paytaxtı Lyublyana şəhərində Səhiyyə Nazirliyində keçirilib.
Mübadilə proqramının əsas məqsədi bütün dünya ölkələrində olduğu kimi, Azərbaycan və Sloveniyada antibiotiklərə davamlılıq probleminin miqyasını anlamaq və bu problemə qarşı tədbirlər planının hazırlanmasını müzakirə etməkdir.
Tədbirin ilk günündə Lyublyana Universitetinin Tibb fakültəsinin professoru Bojana Beovic “Sloveniyada və Lyublyanada antimikrobiyal təcrübələr” və “Sloveniya xəstəxanalarında milli nəzarət ilə sektorlararası əməkdaşlıq mexanizmi”, klinik mikrobiologiya mütəxəssisi Dr. Helena Ribic isə “Sloveniyada antibiotiklərə davamlılığın müşahidəsi” mövzuları üzrə təqdimatlar nümayiş etdiriblər.
Öz növbəsində Azərbaycanda antibiotiklərə davamlılıq, TƏBİB-in tabeliyindəki tibb müəssisələrində infeksion nəzarətin təşkili və mikrobioloji laboratoriyaların iş prinsipi haqqında TƏBİB-in Tibbi xidmətlərin inkişafı departamentinin rəhbəri Yaqut Qarayeva, Yoluxucu xəstəliklər və infeksion nəzarətin təşkili şöbəsinin müdiri Nəzrin Mustafayeva və Kliniki Tibbi Mərkəzin həkim-mikrobioloqu Lalə Vəliyeva çıxış ediblər.
Daha sonra isə Milli İctimai Səhiyyə İnstitutunun ictimai səhiyyə üzrə mütəxəssisi Dr.Polonca Truden Dobrin “Antimikrobiyal davamlılıq nəticələrinin və sübutların effektiv siyasətlərə çevrilməsi”, Milli İctimai Səhiyyə İnstitutunun həkim-epidemioloqu, Lyublyana Universitetinin Tibb fakültəsinin professoru Maja Subelj “Antimikrob rezistentliklə mübarizə siyasətinin qurulmasında Sloveniya təcrübəsi” haqqında məlumatları bölüşüblər.
Həmçinin Azərbaycan heyətini Sloveniyanın Mikrobiologiya və İmmunologiya İnstitutunun laboratoriyalarında olan şəraitlə tanış ediblər.
