Tədbiri giriş sözü ilə açan "Leykemiya ilə Mübarizə” İctimai Birliyinin rəhbəri Mehriban Bağırova bildirib ki, tibb elmi ölkəmizdə inkişaf etdiyindən qan xərçəngindən əziyyət çəkən insanlar vaxtında tibb müəssisələrinə müraciət edərək adekvat müalicə alır və sağlamlıqlarına qovuşurlar. Qeyd edib ki, pasiyentlerin sağalmasında yüksək nəticələri nəzərə alıb, bu barədə əhali arasında düzgün məlumatlandırma kampaniyası təşkil etmək, Azərbaycanda qan xərçəngi (leykemiya) haqqında yanlış stereotiplərin aradan qaldırılması üçün aksiyalar, maarifləndirici seminarlar, sosial çarxların çəkilişi kimi müxtəlif səpkidə tədbirlərin keçirilməsi böyük əhəmiyyət kəsb edir.

 

Daha sonra "Yeni Klinika"nın həkim-hematoloqu Sevil Cəlilovanın “Leykemiyanın erkən diaqnostikası və müalicəsi” və Totem Psixologiya Mərkəzinin psixoloqu Aynur İsmayılovanın “Xəstəlik taleyimiz deyil” mövzusunda məruzələri dinlənilib.

 

“Leykemiya ilə Mübarizə” İctimai Birliyinin üzvü Rəşad Cəlil təşkilatın gördüyü işlər haqqında ümumi məlumatı iştirakçıların nəzərinə çatdırıb.

 

Tədbirdə Quba Rayon Mərkəzi Rayon Xəstəxananın tibb işçiləri və leykemiyalı xəstələrin valideynləri iştirak ediblər.