Döş xərçəngi diaqnozu qoyulduqdan sonra yumurtalıq toxuması çıxarılaraq dondurulan Hilal Gündüz xərçəngə qalib gəldikdən sonra yenidən köçürülən yumurtalıq toxuması sayəsində ana olub.
Aztibb.az-ın medimagazin.com.tr-yə istinadla məlumatına görə, 2016-cı ildə İstanbulda döş xərçəngi diaqnozu qoyulan 37 yaşlı Hilal Gündüz onkoloji müalicəyə başlamazdan əvvəl gələcəkdə hamilə qalmaq üçün Cerrahpaşa Tibb fakültəsinə müraciət edərək yumurtalıq toxumasının götürülərək dondurulmasını istəyib. Ginekologiya və mamalıq kafedrasının müdiri, prof. İsmayıl Çepni və komandasının keçirdiyi əməliyyatla Gündüzün yumurtalıq toxuması çıxarılıb.
5 illik uğurlu onkoloji müalicədən sonra sağlamlığına qovuşan və yenidən xəstəxanaya müraciət edən H.Gündüz hamilə qalmaq istədiyini bildirib və yumurtalıq toxumasının yenidən köçürülməsini istəyib.
Prof. İsmail Çepni və komandasının 2021-ci ildə həyata keçirdiyi əməliyyatla daha əvvəl çıxarılan yumurtalıq toxuması pasiyentə köçürülüb.
Transplantasiyadan 1 il sonra hamilə qalan H.Gündüz 37 həftəlik nəzarətli hamiləlikdən sonra keysəriyyə əməliyyatı ilə 2450 qram çəkidə sağlam qız uşağı dünyaya gətirib.