Bilik Günü münasibətilə irsi qan xəstəliyindən əziyyət çəkən və ilk dəfə məktəbə qədəm qoyan uşaqlara çantalar və müxtəlif məktəb ləvazimatları hədiyyə olunub.

Aksiya "Azərbaycan Qan Donorluğunun İnkişafı Mərkəzi”nin təşkilatçılığı, "Caspian Entertainment Company"nin və Beynəlxalq Muğam Mərkəzinin dəstəyi, həmçinin Talassemiya Mərkəzi, Hemofiliyalı Xəstələrin Respublika Assosiasiyası və "Leykemiya ilə Mübarizə” İctimai Birliyinin birgə tərəfdaşlığı ilə baş tutub.

Bu barədə Aztibb.az-a “Azərbaycan Qan Donorluğunun İnkişafı Mərkəzi”nin mətbuat xidmətindən məlumat verilib.

Bildirilib ki, qanvermə aksiyaları və təbliğat xarakterli tədbirlər ölkə Prezidenti İlham Əliyevin təsdiq etdiyi "Hemofiliya və talassemiyadan əziyyət çəkən uşaqlara qayğı" Dövlət Proqramına uyğun, həmçinin Heydər Əliyev Fondunun "Talassemiyasız həyat naminə" proqramı çərçivəsində təşkil olunur.