Türkiyənin Altınbaş Universiteti Tibb fakültəsinin Döş qəfəsi xəstəlikləri kafedrasının müdiri, prof. Şevket Özkaya COVID-19-un yeni variantında ən çox rast gəlinən şikayətin dad və qoxu itkisi olduğunu bildirib.

Aztibb.az-ın medimagazin.com.tr-yə istinadla xəbərinə görə, dünyanın 50-dən çox ölkəsində aşkarlanan COVID-19-un Omikron ailəsinin son mutant variantı olan Eris İngiltərə və Fransadan sonra digər Avropa ölkələrində də yayılmağa başlayıb.

Yeni variantın yoluxma nisbətinin yüksək olduğunu bildirən Ş.Özkaya, Ümumdünya Səhiyyə Təşkilatının (ÜST) bəzi ölkələrdə COVID-19 epidemiyası səbəbiylə xəstəxanaya yerləşdirmə, reanimasiya şöbələrinə müraciət və ölüm hallarının artmasına diqqət çəkdiyini deyib.

Ş.Özkaya, "ÜST, EG.5.1 (Eris) kimi COVID-19 variantlarının riskini qiymətləndirmək üçün ölkələrin hesabatlarının vacibliyini qeyd edib: "Bu, bütün ölkələri insanların həyatını xilas etmək və koronavirusun uzunmüddətli yükünün qarşısını almaq üçün mövcud tövsiyələrə və tədbirlərə əməl etməyə çağırır."