Tibbi Ərazi Bölmələrini İdarəetmə Birliyinin (TƏBİB) tabeli tibb müəssisəsi olan Salyan Rayon Mərkəzi Xəstəxanasında qastroenteroloqlar üçün təlim keçirilib.
Bu barədə Aztibb.az TƏBİB-in rəsmi feysbuk səhifəsinə istinadla xəbər verir.
TƏBİB-in Azərbaycan Qastroenterologiya İnvaziv Endoskopiya Cəmiyyəti İctimai Birliyi (AQİC İB) ilə bağladığı Memorandum müqaviləsinə əsasən keçirilən “Gastroschool 10” təlimi Səhiyyə Nazirliyinin Elmi Tibbi Şurası tərəfindən 6 DTT krediti ilə qiymətləndirilib.
Təlimdə müvafiq sahə mütəxəssislərinə həzm sistemi xəstəliklərinin müasir diaqnostika, müalicə metodları və profilaktikasına həsr olunmuş mövzular təqdim edilib. Eyni zamanda Endoskopiya otağından canlı bağlantı qurularaq xəstənin endoskopik müayinəsi izlənilib.
Təlimin sonunda mövzu üzrə geniş müzakirə aparılıb və auditoriyanın sualları cavablandırılıb.
Tədbirin TƏBİB-in digər tabeli tibb müəssisələrində keçirilməsi planlaşdırılır.
