"Biontech" şirkəti tərəfindən hazırlanmış mRNA peyvəndi ilə fərdiləşdirilmiş xərçəng müalicəsində perspektivli irəliləyişlər əldə edilib. Belə ki, klinik sınaqlar zamanı İngiltərədə ilk dəfə Adrian Taylor adlı xəstə xərçəng peyvəndi ilə müalicə olunub. 54 yaşlı Taylorun şişlərinin çoxu təxminən bir il ərzində yox olub.
Aztibb.az-ın medimagazin.com.tr-yə istinadla xəbərinə görə, Taylora 2021-ci ilin dekabrında badamcıq xərçəngi diaqnozu qoyulub. Ötən ilin iyununda isə xərçəngin ağciyərə yayıldığı məlum olub. Xəstənin sağ ağciyərində 6 şiş aşkarlanıb, onlardan ən böyüyü 9 millimetr diametrdə olub. 9 millimetrlik şiş bir neçə ay ərzində 25 millimetrə qədər böyüyüb.
Adrian Taylor sentyabr ayında mRNA əsaslı xərçəng peyvəndinin klinik sınaqlarında iştirak etmək üçün müraciət edib və o, Liverpuldakı Clatterbridge Xərçəng Mərkəzində müalicəyə başlayıb. Burada pasiyentə mRNT peyvəndi ilə birlikdə "Pembrolizumab" adlı yeni dərman da verilib. Peyvənd xərçəng hüceyrələrini öldürən yeni immun hüceyrələrini aktivləşdirir. Eyni zamanda, bu dərman immunitet sisteminin xərçəng hüceyrələrinə hücumuna kömək edib.
Adrian Taylor ilk dozanı noyabr ayında qəbul edib, hər üç həftədən bir isə ona yeni doza verilib.
May ayında aparılan müayinə onun ağciyərindəki şişlərdən biri istisna olmaqla, hamısının yoxa çıxdığını göstərib. 25 millimetrlik şiş 4,6 santimetrə qədər kiçilib. Taylor iki il müddətində müalicəsini davam etdirəcək.