"Azərbaycan Respublikasının 2023-cü il üçün Mülki Müdafiə tədbirləri planı" çərçivəsində Şəki rayonu Qoxmuq kənd tam orta məktəbində Fövqəladə Hallar Nazirliyi Şimal-Qərb Regional İdarəsinin əməkdaşları tərəfindən MM tədbirləri planının 6-cı bəndinə əsasən mülki müdafiəni tədris edən müəllimlərin iştirakı ilə tədbir keçirilib.

 

Şəki Rayon Mərkəzi Xəstəxanasından Aztibb.az-a verilən məlumata görə, tədbirdə Mülki Müdafiə İdarəsinin rəisi v.i.e., mayor Sarvan Əsədov, Mülki Müdafiə Hazırlıq şöbəsinin baş zabiti kapitan Rəvan Mustafayev, Yanğın Nəzarət İdarəsinin əməkdaşı, kapitan Oruc Qurbanlı, Şəki Rayon Mərkəzi Xəstəxanasının İlkin Səhiyyə Xidmətinin (İSX) şöbə müdiri Şəlalə Bayramova, Ailə sağlamlıq Mərkəzinin (ASM) həkim terapevti Esmira Əhmədova, ASM həkim pediatrı Rəna Kərimova, eləcə də Şəki rayon ümumtəhsil məktəblərinin 295 nəfərdən ibarət müəllim heyəti iştirak ediblər.

 

Əvvəlcə ölkəmizin ərazi bütövlüyü uğrunda canlarından keçmiş şəhidlərimizin əziz xatirəsi bir dəqiqəlik sükutla yad edilib, Dövlət Himni səsləndirilib.

 

Tədbiri giriş sözü ilə açan mayor Sarvan Əsədov əhalinin mülki müdafiə üzrə maarifləndirilməsinin, mülki müdafiə sahəsində birgə fəaliyyətin və əməkdaşlığın əhalinin təhlükəsizliyinin təmin olunması istiqamətində mühüm rol oynadığını vurğulayıb.

 

Daha sonra İSX şöbə müdiri Şəlalə Bayramova "Fövqəladə hallarda ilkin tibbi yardım" mövzusunda təqdimatla çıxış edib.

 

ASM-in həkimləri Esmira Əhmədova və Rəna Kərimova müxtəlif vəziyyətlərdə təxirəsalınmaz yardım qaydalarından danışıb, müəllimləri maraqlandıran sualları cavablandırıblar.

 

Sonda fövqəladə halların qarşısının alınması və nəticələrinin aradan qaldırılması istiqamətində videoçarxın nümayişi olub.