O, 2005-ci ildə Azərbaycan Tibb Universitetinin Pediatriya fakültəsini bitirib, 2005-2006-cı illərdə ATU-da Pediatriya ixtisası üzrə internatura, 2008-2010-cu illərdə Stavropol Tibb Akademiyasında Torakal cərrahiyyə ixtisası üzrə kliniki ordinatura keçib.

 

Əmək fəaliyyətinə 2007-ci ildə özəl tibb müəssəsində kiçik həkim-pediatr kimi başlayan K.Əsədov 2010-2011-ci illərdə özəl tibb müəssəsində torakal cərrah, 2011-2018-ci illərdə dövlət tibb müəssəsində ürək-damar cərrahı vəzifələrində çalışıb.

 

Kənan Əsədov 2018-ci ildən Mərkəzi Gömrük Hospitalının Kardiologiya şöbəsində ürək-damar cərrahı kimi fəaliyyət göstərir. Hospitalın Kardiologiya şöbəsində neonatal və pediatrik ürək cərrahiyyəsi, aort cərrahiyyəsi, qazanılmış ürək xəstəliklərinin cərrahiyyəsi, minimal invaziv ürək cərrahiyyəsi, TAVİ, aorto koronar şuntlama əməliyyatı, EKQ, holter monitorinqi, intaortik balon pompasının tətbiqi və digər prosedurları həyata keçirir.

 

O, 2018-ci ildə həyata keçirdiyi uğurlu əməliyyata görə Dövlət Sərhəd Xidməti tərəfindən Fəxri fərmana layiq görülüb.

 

Həkim dünya mətbuatında kardiologiyaya dair ən yeni nailiyyyətləri izləyən və öyrənən, Azərbaycanda və qardaş Türkiyədə keçirilən konqreslərdə yaxından iştirak edən, bilik və bacarıqlarını daim artıran ürək-damar cərrahıdır. 2015-ci ildə ürək-damar cərrahı sertifikatı alıb, 2022-ci ildə Türkiyənin Antalya şəhərində Türkiyə Pediatrik Kardioloji və Ürək Damar Cərrahiyyəsi Dərnəyinin təşkilatçılığı ilə keçirilən “Milli Pediatrik Kardioloji və Pediatrik Ürək Cərrahiyyəsi” konqresində iştirak edib.

 

Azərbaycan Kardiologiya Assosiasiyasının üzvüdür.