Oğuz Rayon Mərkəzi Xəstəxanasının tabeliyində olan kənd həkim və tibb məntəqələrində əhaliyə göstərilən tibbi xidmətlərin yaxşılaşdırılması və mövcud çatışmazlıqların aradan qaldırılması məqsədilə hər ay Oğuz RMX-da Tibbi Şuranın iclası keçirilir.
Xəstəxanadan Aztibb.az-a verilən xəbərə görə, iclasda İlkin Səhiyyə Xidmətinin rəhbəri Nəzakət Qədirova, Oğuz RMX-nın həkim-ftiziatrı Mərziyyə Lətifova, Oğuz ASM-nin qadın məsləhətxanasının həkim mama-ginekoloqu Gülsüm İsakova, eləcə də həkim və tibb məntəqələrinin işçiləri iştirak ediblər.
İclası giriş sözü ilə açan Nəzakət Qədirova kənd həkim və tibb məntəqələrinin qarşısında duran vəzifələr, İlkin Səhiyyə Xidmətinin fəaliyyəti, patronaj xidməti, uşaqlar arasında profilaktik peyvəndləmə, dispanserizasiyanın aparılması barədə bölüşüb.
Daha sonra Mərziyyə Lətifova vərəmin yoluxucu xəstəlik olmasını qeyd edərək, bu xəstəliyin vərəm mikrobakteriyası tərəfindən törədildiyini bildirib.
Həkimin sözlərinə görə, vərəm xəstəliyi insanın bütün orqanlarını zədələyə bilər, lakin ən geniş yayılmış forması ağ ciyər vərəmidir. Ağ ciyər vərəmi həm xəstənin özü, həm də onun ətrafında olan insanlar üçün təhlükəlidir.
Daha sonra Gülsüm İsakova hamiləlikdə risk qruplarının əsas problemlərini, risk qruplarının təyininin vacib amillərdən biri olduğunu qeyd edib.
Sonda kənd tibb məntəqələrinin işçiləri iclasda müzakirə olunan məsələlər barədə öz fikirlərini bildiriblər.