Yüzlərlə qadına ana olmaq sevincini bəxş edən yüksəkixtisaslı həkim - Təranə Bayramova - aztibb.az AZƏRBAYCANIN SƏHİYYƏ XƏBƏR PORTALI

Yüzlərlə qadına ana olmaq sevincini bəxş edən yüksəkixtisaslı həkim - Təranə Bayramova

31.08.2023 09:15

“Həkimlərimizi tanıyaq!” rubrikamızda Sizlərə etibarlı, keyfiyyətli, peşəkar xidmət göstərən, yüzlərlə qadına ana olmaq sevincini bəxş edən yüksəkixtisaslı həkim, Mərkəzi Gömrük Hospitalının Mama-ginekologiya şöbəsinin müdiri, t.ü.f.d. Təranə Bayramovanı təqdim edirik.

O, 1995-ci ildə Azərbaycan Tibb Universitetini bitirib. 1995-2000-ci illərdə Türkiyənin paytaxtı Ankara şəhərində Başkent Universitetinin və Dr. Zekai Tahir Burak Qadın Sağlamlığı və Araşdırma Xəstəxanasının Qadın Xəstəlikləri və Doğum kafedrasında diplomdansonrakı təhsilini davam etdirib.

Təranə Bayramova əmək fəaliyyətinə 2000-ci ildə Türkiyənin Ankara şəhərində Gülhane Askeri Tibb Akademiyasında və Dr. Zekai Tahir Burak Qadın Sağlamlığı və Araşdırma Xəstəxanasının Mamalıq-ginekologiya şöbəsində başlayıb. 2000-2001-ci illərdə Azərbaycan Səhiyyə Nazirliyi Elmi Tədqiqat Mamalıq və Ginekologiya İnstitutunun Ana, Döl, Uşaq Sağlamlığının mühafizəsi şöbəsində kiçik elmi işçi, həkim mama-ginekoloq, 2001-2010-cu illərdə Mərkəzi Klinik Xəstəxananın Qadın Sağlamlığı mərkəzində həkim mama-ginekoloq vəzifəsində çalışıb. 2010-cu ildən isə Mərkəzi Gömrük Hospitalında Mama-ginekologiya şöbəsinin müdiri kimi fəaliyyətini davam etdirir.

Peşəkar həkim Mərkəzi Gömrük Hospitalında normal və patoloji hamiləlik təqibi, orqan nəqli olmuş hamilələrin təqibi, normal fizioloji və cərrahi doğuşlar, konservativ və cərrahi ginekologiya, onkoloji cərrahiyyə, uroginekologiya və kosmetik ginekoloji cərrahiyyə, laparoskopik və robotik cərrahiyyə, sonsuzluğun konservativ və cərrahi müalicəsi, inseminasiya və süni mayalanma həyata keçirir.

O, daim öz üzərində çalışan, dünya səhiyyəsinin ən son nailiyyətlərindən bəhrələnən yüksəkixtisaslı mütəxəssisdir. 65-dən çox elmi məqalənin, 1 kitabın həmmüəllifidir.

Təranə Bayramova Türkiyə Ginekoloji və Mamalıq Cəmiyyətinin, Türkiyə Üreme Tibb Birliyinin, Türkiye Üreme Sağlığı ve İnfertilite Birliyinin, Türkiyə Ginekoloji Endoskopiya Birliyinin, Avropa İnsan Bərpası və Embriologiyası Cəmiyyətinin, Türkiyə Çanaq dibi Rekonstruktiv Cərrahiyyə və İnkontinans Birliyinin, Beynəlxalq Pelvikperineologiya Cəmiyyətinin üzvüdür.