"Dahi təbiblər" rubrikasında bu dəfə saytımızın oxucularına Azərbaycan Terapevtlər Cəmiyyətinin sədri, Azərbaycan SSR Əməkdar elm xadimi, tibb elmləri doktoru, professor Məmmədəmin Əfəndiyev haqqında məlumatları təqdim edirik. 

 

O, 1897-ci il sentyabr ayının 23-də Şamaxı rayonunda anadan olub. Təhsil aldığı illərdə Məmmədəmin Əfəndiyevin gənc ziyalı kimi yetişməsində tanınmış şairlərimiz Abbas Səhhət, M.Ə.Sabir, Məmməd Tərrah kimi şəxsiyyətlərlə dostluq edən dayısı Əbdülrəhman Tofiqin böyük rolu olub.

 

Professor Məmmədəmin Əfəndiyev 1944-ci ildən Azərbaycan Dövlət Tibb İnstitutunun I Müalicə-profilaktika fakültəsinin Daxili xəstəliklərin propedevtikası kafedrasının müdiri vəzifəsində çalışıb. 1954-cü ildən ömrünün sonunadək Azərbaycan Terapevtlər Cəmiyyətinin sədri olub.

 

Terapevt kimi fəaliyyət göstərən Məmmədəmin Əfəndiyev patologiya, kurortologiya və tibb tarixi məsələlərinə həsr olunmuş elmi tədqiqatlar aparıb. Ötən əsrin 30-cu illərində Azərbaycanda tüğyan edən malyariya, qurd xəstəliklərinə və digər tropik-parazit xəstəliklərinin aradan qaldırılmasında onun böyük xidmətləri olub. Alim, həmçinin neftçilər arasında təsadüf edilən peşə xəstəliklərinin profilaktika və müalicə üsullarını öyrənib.

 

Qeyd edək ki, hazırda TƏBİB tabeliyində fəaliyyət göstərən Xətai Tibb Mərkəzi Məmmədəmin Əfəndiyevin adını daşıyır.