"Həkimlərimizi tanıyaq!" rubrikamızda söz açacağımız İsmayıl Meybulla oğlu Kərimov zəngin iş təcrübəsinə malik peşakar təbiblərimizdən biridir.
O, 1955-ci il dekabrın 24-də Neftçala rayonunun Aşağı Qaramanlı kəndində anadan olub. 1972-1978-ci illərdə Azərbaycan Tibb Universitetində təhsil alıb. 1978-ci ildə təyinatla Salyan Rayon Mərkəzi Xəstəxanasına göndərilib, 1978-1987-ci illərdə Salyan Rayon Dəri Zöhrəvi Dispanserində, 1987-1992-ci illərdə Salyan Narkoloji Dispanserində həkim işləyib.
İ.Kərimov 1992-1995-ci illərdə Salyan Psixo-Nevroloji Dispanserində baş həkim, 1995-2000-ci illərdə Şorsulu rayonlararası Əsəb Nevroloji Xəstəxanasında baş həkim, 2000-2002-ci illərdə Bakı şəhəri 2 nömrəli Dəmir Yol Xəstəxanasında həkim vəzifələrində çalışıb. 2000-2010-cu illərdə ABU-da müxtəlif vəzifələrdə - baş müəllim, metodist, dekan müavini, dekan kimi fəaliyyət göstərib. 2010-2016-cı illərdə “Readfarm şirkətində” həkim menecer, 2016-2021-ci illərdə Azərbaycan Respublikası Sosial Müdafiə Nazirliyinin tabeliyində olan Tibbi Sosial Ekspertiza və Reabiltasiya Mərkəzinin 2 saylı uşaq reabiltasiya müəssiəsində həkim işləyib. O, 2021-ci ildən Aşağı Surra kənd məntəqəsinin müdiridir.
Həkim 1987-ci ildə Ukrayna Respublikasının Xarkov şəhərində alkoqolizm və narkamaniyanın qeyri dərman vasitələri ilə müalicə kursunu bitirib, 1991-2011-ci illərdə Ə.Əliyev adına Dövlət Həkimləri Təkmilləşdirmə İnstitutunun Psixatriya və narkologiya kafeadrasında ixtisaslaşma kursu keçib, 2012 və 2021-ci illərdə psixiatriya üzrə sertifiaksiya alıb.
O, 2010-cu ildən AMEA-nın Fəlsəfə və Hüquq İnstitutunda “Tibbi etikanın və bioetikanın qarşılıqlı münasibətlərinin təhlili” mövzusunda dissertasiya işini müdafiə edərək fəlsəfə üzrə fəlsəfə doktoru elmi dərəcəsini alıb. İ.Kərimov 20-yə yaxın elmi məqalənin müəllifidir.
