Daban mahmızı çox geniş yayılmış xəstəliklərdən biridir. Dayaq -hərəkət aparatının pozğunluğu olub, tibbdə plantar fassit də adlandırılır. Plantar fassit zamanı daban nahiyəsində olan bağlar iltihablaşır. İltihab artdıqca daban sümüyü üzərində çıxıntılar əmələ gəlir ki, məhz bu çıxıntılara da şporlar deyilir.
Aztibb.az xəbər verir ki, TƏBİB-in tabeliyindəki Sumqayıt Tibb Mərkəzinin Təcili Tibbi Yardım Xəstəxanasının Travmatologiya şöbəsinin müdiri, həkim-travmatoloq Aqil Yusubov bildirib ki, əgər müalicəyə vaxtında və düzgün başlanmazsa daban nahiyəsində güclü ağrılar, axsamalar xəstələri narahat edir.
A.Yusubov qeyd edib ki, daban mahmızının əsas əlaməti daban nahiyəsində olan ağrılardır. Ağrının yaranma səbəbi dabanda yaranmış osteofitlərin yumşaq toxumları zədələməsidir. Daban mahmızının diaqnozu Rentgen müayinəyə əsasən qoyulur. Rentgen müayinə zamanı daban sümüyündə olan iti çıxıntılar -osteofitlər görünür. Daban mahmızının müalicəsi konservativ və cərrahi yollarla aparılır.
