İsti havalarda tez-tez rastlaşdığımız problemlərdən biri də qida zəhərlənmələridir. Qida zəhərlənməsi yeyilən qidanın tərkibindəki bəzi mikroorqanizm və zəhərlərin (toksin) olması nəticəsində ortaya çıxır. Bundan başqa, yeməyin metal və bəzi kimyəvi maddələrlə təması da zəhərlənmələrə səbəb olur.

Aztibb.az xəbər verir ki, bu barədə Mingəçevir Şəhər Mərkəzi Xəstəxanasının həkim-terapevti İlham Əliyev bildirib.

Həkim qeyd edib ki, qida zəhərlənmələri daha çox ət və süd məhsulları, sosiska, kolbasa, dondurma, mayonez və souslu yeməklər, kremli tortlar, bir müddət quruda qalmış dəniz məhsulları kimi qidaların istifadəsi zamanı ortaya çıxır. Yay mövsümündə, xüsusən də anomal istilər zamanı konservləşdirilmiş qidalardan az istifadə olunmalıdır: "Bu cür qidalardan zəhərlənmələr bəzən ağır nəticələr verə bilər. Elə qida növləri də var ki, mövsümdən asılı olmayaraq onların bir-birinə qatılması zəhərlənmələrə yol açır. Qida zəhərlənməsinin qarşısını almaq üçün ən başlıcası məhsulu alarkən istehsal tarixini və son istifadə tarixini yoxlamaq vacibdir"