24-27 iyul tarixlərində Tibbi Ərazi Bölmələrini İdarəetmə Birliyinin (TƏBİB) tabeliyindəki xəstəxanalarda infeksiyaların profilaktikası və infeksion nəzarət (İPİN) işinin təşkili məqsədilə TƏBİB-in və Ümumdünya Səhiyyə Təşkilatının (ÜST) əməkdaşları Quba rayonuna səfər ediblər.

 

TƏBİB-dən Aztibb.az-a verilən xəbərə görə, səfər çərçivəsində Quba Rayon Mərkəzi Xəstəxanası, Quba Rayon Müalicə Diaqnostika Mərkəzi və Quba Rayon Perinatal Mərkəzi ziyarət edilib, müəssisə rəhbərləri ilə yerində görüşlər keçirilib. Bu görüşlər zamanı infeksion nəzarət tədbirlərinin tibbi xidmətlərin keyfiyyətinin artırılmasındakı rolu xüsusi vurğulanıb, bu işin qurulmasında müəssisə rəhbərlərinin roluna diqqət çəkilib.

 

25 iyul tarixində ÜST-nin eksperti Can Hekimoğlu tərəfindən Quba və ətraf rayonlardan dəvət olunmuş infeksion nəzarət üzrə məsul şəxslərin və digər tibbi personalın iştirakı ilə “Əl gigiyenası” mövzusunda təlim keçirilib. Təlimdə açılış nitqi ilə çıxış edən TƏBİB-in Yoluxucu xəstəliklər və infeksion nəzarətin təşkili şöbəsinin müdiri Nəzrin Mustafayeva iştirakçılara müraciət edərək səhiyyə xidmətləri ilə əlaqəli infeksiyaların qarşısının alınmasında vəzifəsindən asılı olmayaraq, bütün tibb işçilərinin komanda şəklində çalışmalı olduğunu, bunun bütün tibb işçilərinin mənəvi borcu olduğunu qeyd edib.

 

Növbəti günlərdə ÜST-nin ekspertləri “Müəssisə səviyyəsində infeksiyaların profilaktikası və infeksion nəzarət tədbirlərinin qiymətləndirilməsi” alətindən istifadə etməklə Quba Rayon Mərkəzi Xəstəxanasını infeksion nəzarət baxımından dəyərləndirib, infeksion nəzarət üzrə məsul şəxslərə öz tövsiyələrini veriblər.

 

Qeyd edək ki, bu dəyərləndirmə gələcəkdə infeksion nəzarət fəaliyyətlərinin qiymətləndirilməsində meyar rolunu oynayacaq və bu baxımdan əhəmiyyətlidir.

 

Səfər ÜST-nin texniki dəstəyi ilə “Azərbaycanda Pandemiyaya Cavab Tədbirləri” layihəsi çərçivəsində həyata keçirilib.