Azərbaycan Respublikası Dövlət Gömrük Komitəsi Tibbi Xidmət İdarəsinin Bio-Etika Komissiyasının növbəti iclası keçirilib.

Mərkəzi Gömrük Hospitalından Aztibb.az-a verilən məlumata görə, iclasda Ümumi cərrahiyyə şöbəsinin müdiri Namiq Novruzovun Hospitalın bazasında klinik tədqiqat keçirilməsi ilə bağlı müraciətinə baxılıb.

Tədqiqat haqqında məlumat verən N.Novruzov bildirib ki, “Xolesistektomiyaya bağlı biliklərin və nəticələrin qlobal miqyasda dəyərləndirilməsi” (GECKO – Global Evaluation of Cholecystectomy Knowledge and Outcomes) tədqiqatı beynəlxalq, çoxmərkəzli, prospektiv müşahidə xarakterli elmi araşdırmadır.

Tədqiqatın məqsədi öd kisəsi xəstəliklərinin müalicəsində tətbiq edilən laparoskopik xolesistektomiya əməliyyatlarının təhlükəsiz icra edilməsi ilə bağlı beynəlxalq səviyyədə məlumatların toplanması və təhlil edilməsidir.

Azərbaycanda bir sıra digər klinikaların da bu tədqiqata qoşulmağı planlaşdırdığını bildirən Namiq Novruzov komissiya üzvlərinin suallarına cavab verib.

Bio-Etika Komissiyasının üzvləri müzakirə edilən tədqiqatın nəticələrinin laparoskopik xolesistektomiya əməliyyatlarının təhlükəsiz icra edilməsi ilə bağlı mövcud bilikləri zənginləşdirəcəyini qeyd edərək, Mərkəzi Gömrük Hospitalı bazasında aparılacaq “Xolesistektomiyaya bağlı biliklərin və nəticələrin qlobal miqyasda dəyərləndirilməsi” (GECKO – Global Evaluation of Cholecystectomy Knowledge and Outcomes) tədqiqatının etik standartlara cavab verdiyini təsdiq ediblər.