TƏBİB-in İcraçı direktoru Vüqar Qurbanovun əmri ilə yaradılan Komissiya ana və uşaq sağlamlığının qorunması istiqamətində tibbi xidmətin təşkilinin dəyərləndirilməsi və doğuşayardım xidmətinin qiymətləndirilməsi məqsədilə Gəncə Regional Perinatal Mərkəzinə ezam olunub.

 

Gəncə Şəhər Birləşmiş Xəstəxanasından Aztibb.az-a verilən məlumata görə, TƏBİB-in İcraçı direktorunun müavini, komissiyanın sədri Anar İsrafilov, İlkin səhiyyə və təcili yardım departamentinin rəhbəri Anar Ağayev və digər üzvlərin mərkəzə səfəri baş tutub.

 

Mərkəzdə analara və yenidoğulmuşlara göstərilən tibbi xidmətin, infeksiyaların profilaktikası və infeksion nəzarət (İPİN) qaydalarının tətbiqinin, qadın və reproduktiv sağlamlığın qorunmasına yönəlmiş tədbirlərin həyata keçirilməsinin, yenidoğulmuşların sağlamlığının qorunması istiqamətində onlara göstərilən reanimasion xidmətin, müəssisədə keyfiyyətə nəzarət işinin, kritik durumda daxil olan hamilələrə göstərilən tibbi xidmətinin təşkilinin dəyərləndirilməsi aparılıb.

 

Gəncə Şəhər Birləşmiş Xəstəxanasında GəncəTibbi Ərazi Bölməsinə daxil ətraf rayonların (Samux, Naftalan, Daşkəsən, Göygöl, Goranboy) aidiyyəti işçilərinin iştirakı ilə videoformatda konfrans keçirilib.

 

Tədbirdə 2023-cü ilin ilk 6 ayında TƏB üzrə göstərilən antenatal və doğuşayardım xidmətinin müqayisəli nəticələri barədə ətraflı məlumat təqdim edilib.

 

Açılış nitqi ilə çıxış edən TƏBİB-in İcraçı direktorunun müavini Anar İsrafilov ana və uşaq sağlamlığının səhiyyənin prioritet istiqamətlərindən olduğunu qeyd edərək, doğum və reproduktiv sağlamlıq sahəsində mövcud problemlərin müzakirəsini aparıb. Gələcəkdə bu halların aradan qaldırılmasına nail olmaq üçün görüləcək tədbirlərlə Azərbaycanda ana və uşaq ölümlərinin tədricən azaldılmasına çalışacaqlarını bildirib.

 

TƏBİB-in İlkin səhiyyə və təcili yardım departamentinin müdiri Anar Ağayev Gəncə şəhərində Ailə Sağlamlıq Mərkəzlərində ilkin səhiyyənin, antenatal xidmətin təşkili haqqında nitqlə çıxış edib.

 

TƏBİB-in Ana və uşaq sağlamlığı şöbəsinin müdiri Sevinc Məmmədova Gəncə regionu üzrə antenatal xidmətin 2023-cü ilin ilk 6 ayının müqayisəli təhlilini və “Ana və uşaq sağlamlığının yaxşılaşdırılmasına dair Dövlət Proqramının” icrası ilə bağlı təqdimatlarla çıxış edib.

 

TƏBİB-in Ana və uşaq sağlamlığı şöbəsinin böyük məsləhətçisi Şəbnəm Şahgəldiyeva Gəncə Perinatal Mərkəzdə neonatal xidmətin və təxliyələrin təşkili, regionda əlaqəli pediatrik xidmətin təşkilinə həsr olunan məruzəni diqqətə çatdırıb.

 

Doğuşayardım komissiyasının sədri Təranə Rəcəbli öz çıxışında Gəncə Perinatal Mərkəzində perinatal xidmətin təşkilinə dair məlumat verib.

 

Tibbi xidmətlərin inkişafı departamentinin Yoluxucu xəstəliklər və infeksion nəzarətin təşkili şöbəsinin müdiri Nəzrin Mustafayeva Perinatal xidmətdə infeksion nəzarətin təşkili barədə geniş məzmunda çıxış edib.

Keyfiyyətin idarə olunması şöbəsinin məsləhətçisi Samirə Nəcəfova hal-hazırda tətbiq edilən keyfiyyət standartları barədə və onların hesabatlılıq sisteminin tətbiqinin təkmilləşdirilməsi üçün həyata keçirilməli olan tədbirlər haqqında məlumat verib.

 

Tədbirin sonunda doğuşayardım xidməti üzrə mövcud əmr və sərəncamların, təlimat və protokolların icrasına nəzarəti, həmçinin antenatal və doğuşayardım işinin gücləndirilməsi məqsədi ilə bu sahədə müntəzəm olaraq görüşlərin keçirilməsi barədə müəssisə rəhbərlərinə tapşırıqlar verilib.