Alman Tibb Assosiasiyasının cari statistikasının (2022-ci ilin dekabrına olan) nəticələrinə əsasən, Almaniyada xaricdən gələn 60 minə yaxın həkim çalışır.
Aztibb.az xəbər verir ki, bu barədə Almaniyanın Bad Salzungen Xəstəxanasının Qulaq, burun, boğaz xəstəlikləri və üz plastik cərrahiyyə klinikasının şöbə müdiri Cavid Hüseynzadə sosial şəbəkədə məlumat paylaşıb.
Məlumatda bildirilib ki, Almaniyada cəmi 421.000 həkim işləyir, bunun 14 faizdən çoxu başqa ölkələrdən gələnlərdir. Azərbaycanlı həkimlərin sayı isə 1359 nəfərə çatıb.
Qeyd olunub ki, 2022-ci ildə əcnəbi həkimlərin sayı 2683 nəfər artıb. Bütövlükdə Almaniyada əcnəbi həkimlərin sayının illərdir artdığı müşahidə olunur. Son 25 ildə bu say beş dəfədən çox artıb.
Əmək Bazarı və Peşə Tədqiqatları İnstitutunun araşdırmasına görə, hazırda Almaniyada 15 000-dən çox həkim çatışmazlığı var.