Uşaqlar arasında yoluxucu xəstəliklərin qarşısının alınması və immunoprofilaktika işinin yaxşılaşdırılması məqsədi ilə Azərbaycan Respublikası Nazirlər Kabinetinin "2023-2027-ci illər üzrə uşaqlar arasında yoluxucu xəstəliklərin immunoprofilaktikasına dair Tədbirlər Proqramı" çərçivəsində Şəki Rayon Mərkəzi Xəstəxanasının Ailə Sağlamlıq Mərkəzində tədbir keçirilib.

Rayon Xəstəxanasından Aztibb.az-a verilən xəbərə görə, tədbirdə İlkin Səhiyyə Xidməti (İSX) şöbəsinin müdiri, həkim-terapevt Şəlalə Bayramova, ASM bölmə müdiri, həkim-terapevt Firuzə Həmidova, Şəki şəhər Gigiyena və Epidemiologiya Mərkəzinin həkim-epidemioloqu Fəhimə Paşayeva, eləcə də ailə həkimi-terapevtlər, pediatrlar, kənd həkim və kənd tibb məntəqə müdirləri və tibb işçiləri iştirak ediblər.

Tədbirdə ailə həkim-pediatr Fəxriyyə Salmanova yoluxucu xəstəliklərin qarşısının alınması üçün ən effektiv üsul - peyvəndlənmənin əhəmiyyəti barəsində çıxış edib.

Sonra həkim-epidemioloq Fəhimə Paşayeva çıxış edərək bildirib ki, bu xəstəliklərin profilaktikası işində uşaqların milli təqvim əsasında vaxtında peyvənd olunması xüsusi əhəmiyyət kəsb edir. Bu gün Azərbaycanda uşaqların yoluxucu xəstəliklərdən qorunması üçün inkişaf etmiş Avropa ölkələrində olduğu kimi 10 xəstəliyə qarşı peyvənd edilir.

Qeyd olunub ki, ölkə üzrə peyvənd planı hər il təxminən 96-98% yerinə yetirilir. Respublikada aparılan məqsədyönlü immunoprofilaktika tədbirləri nəticəsində əvvəllər poliomielit xəstəliyinə görə endemik sayılan Azərbaycan artıq bu xəstəlikdən azad diyara çevrilmiş və bu statusu saxlayır.

Daha sonra ailə həkimi-terapevt Gülşən İsmayılzadə "Anafilaktik şok" mövzusunda təqdimatla çıxış edib.