TƏBİB-in tabeliyində olan "Xocalı Rayon Mərkəzi Xəstəxanası" publik hüquqi şəxsdə "Heydər Əliyevin səhiyyəmizə töhfəsi" mövzusunda tədbir keçirilib.

Aztibb.az-a Xəstəxanadan bildirilib ki, öncə Dövlət Himni səsləndirilib, Ulu Öndər Heydər Əliyevin və şəhidlərimizin xatirəsi bir dəqiqəlik sükutla yad edilib.

Daha sonra Xocalı RMX PHŞ-ın ASM müdiri Mütalim Cəfərov çıxış edərək Ümummilli Lider Heydər Əliyevin ölkəmizin qüdrətlənməsində, xalqın rifahının yüksəldilməsində misilsiz xidmətlərindən, görkəmli şəxsiyyətin dünya siyasətinə verdiyi töhfələrdən və çoxşaxəli fəaliyyətindən danışıb. O, Ulu Öndərin tibb sahasinə göstərdiyi xüsusi qayğıdan bəhs edib.

Tədbirdə Ümumi şöbənin müdiri Nuriyyə Hüseynova Ulu Öndərin səhiyyədə yaratdığı yeniliklər barədə söhbət açıb. Heydər Əliyevin başqa sahələrdə olduğu kimi, səhiyyə sahəsinin inkişafına göstərdiyi xidmətləri vurğulayaraq bu gün bütün sahələrdə təməli Ümummilli Lider tərəfindən qoyulmuş siyasətin Prezident İlham Əliyev tərəfindən layiqincə, uğurla və peşəkarlıqla davam etdirildiyini bildirib.