17 iyun - Tibb İşçilərinin Peşə Bayramı Günü münasibətilə Zaqatala Rayon Mərkəzi Xəstəxanasında tədbir keçirilib.

 

Xəstəxanadan Aztibb.az-a verilən məlumata görə, tədbiri giriş sözü ilə açan direktor Tamara Nurəliyeva son illərdə ölkə səhiyyəsinin nailiyyətlərindən söhbət açıb. Azərbaycan Respublikasının Prezidenti İlham Əliyevin səhiyyə sahəsinə diqqət və qayğısı nəticəsində bölgələrdə müasir tibb mərkəzlərinin yaradıldığını, köhnə tibb ocaqlarının təmir olunaraq müasir avadanlıqlarla təmin edildiyini vurğulayan direktor tibb müəssisələrinin fəaliyyətinin yaxşılaşdırılmasına, ümumilikdə tibbi xidmətin müasir tələblər səviyyəsinə qaldırılmasına yeni imkanlar açıldığını bildirib.

 

O, Azərbaycanda əhalinin sağlamlığının qorunması üzrə fəaliyyət göstərən bütün tibb işçilərini bu əlamətdar gün münasibətilə təbrik edib, tutduqları bu şərəfli peşədə onlara müvəffəqiyyətlər arzulayıb.

 

Daha sonra direktorun cərrahi xidmətlər üzrə müavini Vasif İsrafilzadə, Terapevtik xidmətlər üzrə müavini Nigar Şahmərdanova və İnzibati məsələlər üzrə müavini Emil Rüstəmov çıxış edərək tədbir iştirakçılarına təbrik və diləklərini bildiriblər.

 

Sonda  Zaqatala Rayon İcra başçısının müavini-İctimai Siyasi və Humanitar məsələlər üzrə şöbə müdiri Vəfa Süleymanova və xəstəxana kollektivinin iştirakı ilə Ümummilli Lider Heydər Əliyevin abidəsi ziyarət edilib, abidə önünə gül dəstələri düzülərək dahi rəhbərin əziz xatirəsi ehtiramla yad olunub.