Binəqədi Tibb Mərkəzində 17 iyun- Tibb İşçilərinin Peşə Bayramı Gününə həsr olunmuş tədbir keçirilib.

Mərkəzdən Aztibb.az-a bildirilib ki, tədbirdə çıxış edən Binəqədi Tibb Mərkəzinin Doğum evinin rəhbəri Zeynəb Hüseynova tibb işçilərini təbrik edərək, dövlətin tibb sahəsinə göstərdiyi diqqətdən danışıb. O, dövlətin siyasətinin mərkəzində onun vətəndaşının sağlamlığının qorunmasının dayandığını vurğulayıb.

Daha sonra çıxış edə Binəqədi Tibb Mərkəzinin Cərrahiyyə şöbəsinin müdiri Feyruz Verdiyev həm birinci Qarabağ müharibəsi, həmdə ikinci Vətən müharibəsi dövründə fədakar tibb işçilərinin fəaliyyəti haqqında məlumat verib.

Göstərilən etimada və dəyərə görə dövlətimizə minnətdar olduğunu bildirən Binəqədi Tibb Mərkəzinin Terapiya şöbəsinin müdiri Kəmalə Abdullayeva nitqini Ulu Öndər Heydər Əliyevin əsasını qoyduğu səhiyyə siyasətinin günümüzdə uğurla davam etdirildiyi ilə yekunlaşdırıb.

Sonda Binəqədi Tibb Mərkəzinin direktoru Əsədulla Sultanov çətin və şərəfli peşə yolunda bütün fədakar tibb işçilərini təbrik edib. Direktor Vətən müharibəsi və koronavirus pandemiyası zamanı tibb işçilərinin fədakar əməyini qeyd edib. Dövlətimizin ağ xalatlı qəhrəmanları daima diqqət mərkəzində saxladığını və səhiyyə sahəsində aparılan islahatların yeni müasir səhiyyə anlayışını yaratdığını bildirib.