Heydər Əliyev Fondunun dəstəyi ilə Azərbaycanda səfərdə olan İsrailin Soroka Universiteti Tibb Mərkəzinin Neyrocərrahiyyə şöbəsinin müdiri Mikki Gideon, Uşaq nevrologiyası və autizm şöbəsinin müdiri Analiya Diana, Uşaq reanimasiyası şöbəsinin müdiri Tsaxi, Karmel Tibb Mərkəzinin Uşaq İnkişafı İnstitutunun rəhbəri Şemir Lilah və Şnayder Tibb Mərkəzinin Uşaq nefrologiyası şöbəsinin müdiri Dani Landau TƏBİB-in tabeliyindəki Sumqayıt Tibb Mərkəzində (STM) olublar.

 

TƏBİB-dən Aztibb.az-a verilən xəbərə görə, israilli həkimlər STM-in nəzdindəki Perinatal Mərkəzin iş fəaliyyəti və yaradılan şəraitlə yaxından tanış olublar.

 

Sumqayıt Tibb Mərkəzinin direktoru Səkinə Sadıxova qonaqlara rəhbərlik etdiyi qurum haqqında qonaqlara məlumat verib, Perinatal Mərkəzdə perinatal və reproduktiv sağlamlıq xidməti göstərildiyini bildirib.

 

Diqqətə çatdırılıb ki, Perinatal Mərkəzdə ikinci səviyyəli laboratoriya 7/24 saat fəaliyyət göstərir. Eyni zamanda tibb müəssisəsində Hamiləliyin patologiya şöbəsi, Doğum şöbəsi, Ginekologiya şöbəsi, Təcili və təxirəsalınmaz tibbi yardım (TTTY) şöbəsi, Anesteziologiya-reanimatologiya şöbəsi, Neonatal reanimasiya və intensiv terapiya bölümü, Yarımçıq və xəstə yenidoğulmuşlar şöbəsi, Əməliyyat bölməsi, Poliknik şöbə, Laboratoriya şöbəsi, eləcə də Diaqnostika və katamnestik izləm kabinetləri fəaliyyət göstərir. Neonatal reanimasiya və intensiv terapiya şöbəsində 10 çarpayılıq yeni reanimasiya zalı təşkil olunub. Reanimasiya zalı 16 hava və oksigen çıxışı ilə təmin olunub.

 

Mərkəzdə təbii və cərrahi doğuşların, açıq və laporoskopik, ginekoloji əməliyyatların həyata keçirilməsi üçün hər bir şərait var. Müəssisə artıq regional mərkəzə çevrilib. Bura Sumqayıtla yanaşı, şimal bölgəsindən olan xəstələr də müraciət edir.

 

Qeyd edək ki, tibb müəssisəsində 2023-cü ilin ötən dövrü ərzində 165 ROP müayinə olunub, 701 topuq testi götürülüb.

 

Mərkəz "Körpə Dostu Klinikası" təşəbbüsünə qoşulub. 2023-cü ilin son 5 ayında perinatal xidmət almış körpələrdən 126-sı özəl və ya digər regionlarda fəaliyyət göstərən TƏBİB tabeli tibb müəssisələrindən qəbul edilib.

 

Sonda israilli qonaqları maraqlandıran suallar cavablandırılıb.