İcbari Tibbi Sığorta üzrə Dövlət Agentliyi ilə Ankara Universiteti arasında imzalanmış “Təhsil xidmətlərinin göstərilməsi və elmi əməkdaşlığa dair Protokol” çərçivəsində “Xəstəxanaların idarə edilməsi” mövzusunda keçirilən təlim yekunlaşıb.
Agentlikdən Aztibb.az-a verilən məlumata görə, bağlanış mərasiminda çıxış edən Agentliyin İdarə Heyətinin sədrinin müavini Nigar Bayramova Agentliklə qardaş ölkənin səhiyyə və tibbi sığorta ilə bağlı aidiyyəti dövlət qurumları arasında səmərəli əməkdaşlıq münasibətlərinin qurulduğunu bildirib. Türkiyə universitetlərinin Azərbaycanda tibbi kadrların hazırlanmasına hər zaman töhfə verdiyini qeyd edən
N.Bayramova Ankara Universitetinin keçirdiyi təlimlərin kadr potensialının gücləndirilməsində əhəmiyyətli olduğunu söyləyib.
Qeyd edək ki, Ankara Universiteti və Türk Əməkdaşlıq və Koordinasiya Agentliyinin (TİKA) təşkilatçılığı ilə baş tutan təlimdə Agentlik və TƏBİB-in əməkdaşları, həmçinin 12 dövlət tibb müəssisəsinin (Masallı, Abşeron, Tərtər, Göygöl, Zaqatala, Salyan, Bərdə rayon mərkəzi xəstəxanalarının, Gəncə Şəhər Birləşmiş Xəstəxanasının, habelə Suraxanı, Sabunçu tibb mərkəzlərinin, Yeni Klinika, Respublika Klinik Xəstəxanasının) direktor və müavinləri iştirak edib.