Aztibb.az-a TƏBİB-dən verilən məlumata görə, təlimlərin keçirilməsində məqsəd müvafiq sahə mütəxəssislərinin (həkim-mama-ginekoloq, ailə həkimi, kardioloqlar, reanimotoloqlar və s.) hamilələrdə trombofilik ağırlaşmalar risk faktorlarının erkən aşkarlanması və profilaktikası istiqamətində bilik-bacarıqlarının təkmilləşdirilməsidir.

 

Sözügedən mövzu üzrə ilk təlim TƏBİB-in tabeliyindəki Quba Rayon Mərkəzi Xəstəxanasında keçirilib. Təlimdə Quba rayonu ilə yanaşı, digər rayon xəstəxanalarınının (Xaçmaz, Qusar, Şabran, Siyəzən) da nümayəndələri iştirak ediblər.

 

Tədbiri giriş sözü ilə açan TƏBİB-in İnsan resursları departamentinin əməkdaşı Nahidə Mahmudova ana və uşaqların sağlamlığının qorunması məsələsinin dövlətin daim diqqət mərkəzində olmasını, bu baxımdan perinatal yardımın keyfiyyətinin yaxşılaşdırılması və bu xidmətdə çalışan tibb işçilərinin peşə biliklərinin artırılması istiqamətində aparılan tədbirlərin davamlılığının TƏBİB üçün mühüm əhəmiyyət kəsb etdiyini vurğulayıb.

 

Quba Rayon Mərkəzi Xəstəxanasının direktoru Əliyar Sərvərov perinatal və uşaq statistik göstəricilərinin beynəlxalq standartlara uyğunlaşdırılması, antenatal dövrdə hamilə qadınların sağlamlığına təhlükə yarada bilən patoloji vəziyyətlərin vaxtında aşkarlanması işinin təkmilləşdirilməsi, doğuşayardım xidməti müəssisələrinin maddi-texniki bazasının gücləndirilməsi və təchizatının yaxşılaşdırılması ilə yanaşı, kadr potensialının gücləndirilməsinin prioritetliyini qeyd edib.

 

Daha sonra TƏBİB-in tabeliyindəki tibb müəssisələrində hamilə, doğuş, zahılıq dövrlərində ana ölümü və ağırlaşmış doğuş hallarının təhlili üzrə Komissiyasının üzvü, t.ü.f.d. Vəfa Qurbanova yüksək riskli hamiləlik ağırlaşmalarının yaranmasında trombofiliyanın rolu və kliniki əhəmiyyəti, hamiləlikdə tromboz riskinin qiymətləndirilməsinə dair müasir sübutlu standartlar və taktika seçimi mövzuları üzrə ətraflı məruzə edib.

 

Azərbaycan Kardiologiya Cəmiyyətinin üzvü, həkim-kardioloq Şəhanə Ələsgərli hamiləlikdə kardioloji risklər haqqında ən yeni məlumatları diqqətə çatdırıb.

 

Sonda təlim iştirakçılarını maraqlandıran suallar cavablandırılıb.