Şahbuz Rayon Mərkəzi Xəstəxanası publik hüquqi şəxsin həkimləri tərəfindən “Erkən nikah halları və onun fəsadları” devizi altında Şahbuz şəhər 2 nömrəli tam orta məktəbdə marifləndirici tədbir keçirilib.

Naxçıvan Səhiyyə Nazirliyindən Aztibb.az-a verilən xəbərə görə, məktəbin pedaqoji kollektivinin və yuxarı sinif şagirdlərinin iştirak etdiyi tədbirdə xəstəxananın həkimi Fatma Həsənova çıxış edib.

Şagirdlərin maarifləndirildiyi tədbirdə erkən nikahların həm sosial, həm mənəvi, həm də sağlamlıq baxımından zərərləri barədə geniş müzakirələr aparılıb.

Vurğulanıb ki, yeniyetmə yaşında ailə quran insan həyatın ritmini pozmuş olur. Orta məktəbi bitirmək, ali məktəbə qəbul olmaq, mütəxəssis kimi yetişmək, bilik və bacarıqları cəmiyyətin inkişafı istiqamətində yönəltmək şüurlu canlının strateji hədəfi olmalıdır. Belə ki, erkən nikahlar bu hədəfə çatmaqda ən böyük maneədir.

Bildirilib ki, erkən yaşda qurulan nikahlar yeniyetmələrin sağlamlığına, gələcək həyatlarına ciddi mənfi təsir göstərməklə yanaşı, ailədaxili zorakılıq hallarına da gətirib çıxarır. Çünki insanın dünyagörüşü 18 yaşından sonra formalaşmağa başlayır. İnsanda bu yaşadək ailə haqqında təsəvvürlər ya olmur, ya da yanlış ştrixlərlə əhatələnir. Son dövrlər artan intihar hadisələri, qadınlara qarşı şiddət hallarının böyük əksəriyyəti məhz müqəddəs ailə prinsiplərinin dağılmasının nəticəsidir.

Tədbirdə, həmçinin erkən nikah problemi ilə bağlı aparılan elmi-analitik araşdırmalar və bu problemin qarşısının alınması məqsədilə son illər həyata keçirilən tədbirlər, habelə erkən nikahla mübarizə yolları barədə məlumat verilib.

Sonda mövzu ilə bağlı şagirdləri maraqlandıran suallar cavablandırılıb.