TƏBİB “Tibb müəssisələrinin laboratoriyalarının standartlaşdırılması” layihəsi çərçivəsində İsmayıllı Rayon Mərkəzi Xəstəxanasının tibbi laboratoriyaları yenidən təşkil olunaraq istifadəyə verilib.

 

Aztibb.az-a TƏBİB-dən bildirilib ki, İsmayıllı Rayon Mərkəzi Xəstəxanasının tibbi laboratoriyasının xidmət sahələri genişləndirilib, Mərkəzi Laboratoriyanın Biokimya, Hematologiya, Mikrobiologiya və İmmunologiya bölmələri təşkil olunub. Mərkəzi Laboratoriyanın fəaliyyətinin bütün mərhələlərdə insan faktorunu və xətaları minimuma endirmək üçün sistem tam avtomatlaşdırılıb.

Avtomatlaşdırılmış sistemlərin tətbiqi ilə analiz nəticələrinin hazır olma müddəti dəfələrlə qısaldılıb, bütün analizatorlar “E-Təbib” proqram təminatına, eləcə də kodlaşdırılmış test nəticələrinin sistemə avtomatik inteqrasiyası təmin edilib.

 

Laboratoriyaların fəaliyyəti pre-analitik, analitik və post-analitik mərhələnin tələblərinə uyğun olaraq təşkil edilib. Belə ki, laboratoriyalar tanınmış xarici şirkətlərin tam avtomatlaşdırılmış biokimyəvi, immunokimyəvi, mikrobioloji, hematoloji, ELISA və s. sistemləri ilə təchiz olunub.

 

Eyni zamanda, laboratoriyanın həkim və laborantlarına, qanalma tibb bacılarına müasir nəzəri və praktik təlimlər keçirilib.

 

Artıq ambulator və stasionar pasiyentlər İcbari Tibbi Sığorta üzrə Dövlət Agentliyinin Xidmətlər Zərfinə daxil olan 800-dək laborator xidməti tam şəkildə, ən müasir tələblərə və protokollara uyğun olaraq əldə edə bilirlər.

 

Qeyd edək ki, pasiyentlər tamamilə elektronlaşdırılmış analizlərinin nəticələrini tibb müəssisəsinə gəlməklə, həmçinin müəssisəyə gəlmədən onlayn şəkildə ( https://lab.tabib.gov.az/ ) əldə edə bilərlər.