Aztibb.az "Həkimlərimizi tanıyaq!" rubrikasında peşəkar səhiyyə işçilərini tanıtmaqda davam edir. 

 

Rubrikamızda bu dəfə Qazax Müalicə Diaqnostika Mərkəzinin həkim-cərrahı Cəbrayıl Vəlizadə haqqında məlumatları diqqətinizə çatdırırıq. 

 

O, 1956-cı ildə Qazax şəhərində anadan olub. 1973-cü ildə orta məktəbi qızıl medalla bitirib və həmin il Azərbaycan Tibb İnstitutuna qəbul olub. Oxuduğu müddətdə Lenin təqaüdünə layiq görülüb. Tələbəlik illərində “Ən yaxşı tələbə elmi işinə görə” medalı ilə təltif olunub. 1979-cu ildə Azərbaycan Dövlət Tibb İnstitutunun Müalicə-profilaktika fakültəsini fərqlənmə diplomu ilə bitirib.

 

Cəbrayıl Vəlizadə 1979-1980-ci illərdə Bakı şəhəri “Təcəli yardım” xəstəxanasında cərrahiyyə ixtisası üzrə internatura keçib. 1980-1983-cü illərdə Şuşa Mərkəzi Xəstəxanasında həkim-cərrah işləyib.

1983-1985-ci illərdə SSRİ Tibb Elmlər Akademiyasının Vişnevski adına Cərrahiyyə İnstitutunda “Cərrahiyyə” ixtisası üzrə ordinatura təhsili alıb.

 

1986-2015-ci illərdə Qazax RMX-da cərrah, 2002-ci ildən isə həmin xəstəxananın Cərrahiyyə şöbəsinin müdiri vəzifələrində çalışıb. O, 2015-ci ildən Qazax Müalicə Diaqnostika Mərkəzində həkim-cərrahı kimi fəaliyyətini davam etdirir.

 

Peşəkar həkim 2005-2009-cu illərdə Qazax Bələdiyyəsinin üzvü seçilib.

 

2020-ci ildə Azərbaycan Respublikiasının Prezidentinin sərəncamı ilə “Tərəqqi” medalı ilə təltif olunub.