Qalxanabənzər vəzi və onun problemlərini öyrənən Avropa Tireoid Assosiasiyasının təşəbbüsü ilə 2009-cu ildən etibarən hər il mayın 25-i Ümumdünya Qalxanabənzər Vəzi Günü kimi qeyd edilir. 

Aztibb.az xəbər verir ki, Azərbaycanda Ümumdünya Qalxanabənzər Vəzi Günü 2013-cü ildən qeyd olunmağa başlanılıb. Bu günün qeyd edilməsində əsas məqsəd alimlərin, tibb işçilərinin və ictimaiyyətin diqqətini qalxanabənzər vəzinin problemlərinə cəlb etməkdir.

Qalxanabənzər vəzi xəstəlikləri əsasən orqanizmdə yod çatışmazlığı fonunda əmələ gəlir. Bildiyimiz kimi, yod elementi insan orqanizminin fəaliyyəti üçün çox böyük əhəmiyyətə malikdir. Təsadüfi deyil ki, tibb işçiləri qalxanabənzər vəzi ümumi hormonal sistemin “dirijoru” adlandırırlar. Bu vəzin xəstəlikləri zamanı onun hormonlarının qanda səviyyəsinin həm anormal surətdə artması, həm də kəskin azalması orqanizmin normal fəaliyyətinin pozulmasına səbəb olur.

Tibbi statistikaya əsasən, dünya əhalisinin üçdə biri bu orqanın fəaliyyətinin pozulması nəticəsində əmələ gələn müxtəlif xəstəliklərdən əziyyət çəkir. Böyüklərin təxminən 30 faizinin boğaz nahiyələrində düyünlər müşahidə edilir. Yod çatışmazlığından əmələ gələn qalxanabənzər vəzinin böyüməsi isə, insanların 10-30 faizində rast gəlinir.