Saatlı Rayon Mərkəzi Xəstəxanasında Ulu Öndər Heydər Əliyevin anadan olmasının 100 illiyinə həsr edilmiş tədbir keçirilib.

 

Xəstəxanadan Aztibb.az-a verilən xəbərə görə, Dövlət Himninin səsləndirilməsi ilə başlayan tədbirdə əvvəlcə müasir Azərbaycanın qurucusu, Ümummilli Lider Heydər Əliyevin əziz xatirəsi bir dəqiqəlik sükutla yad edilib.

 

Tədbiri giriş sözü ilə açan xəstəxananın direktoru Pərvin Məmmədov bildirib ki, Ümummilli Lider Heydər Əliyevin anadan olmasının 100 ili tamam olur. Bununla əlaqədar Azərbaycan Respulikasının Prezidenti İlham Əliyevin sərəncamı ilə 2023–cü il “Heydər Əliyev “ili elan olunub.

 

Direktorun sözlərinə görə, dövrünün ən nüfuzlu siyasətçiləri ilə bir sırada dayanan Heydər Əliyev Azərbaycanın müasir simasının, xalqımızın zəngin dəyərlərinin tanıdılması və ölkəmizin beynəlxalq münasibətlər sistemində layiqli mövqe qazanmasında müstəsna rol oynamışdır: “Ermənistan-Azərbaycan münaqişəsinin beynəlxalq hüququn norma və prinsipləri əsasında həlli Ulu Öndərin qarşıya qoyduğu başlıca vəzifə olmuş, ölkəmizin bütün resursları, xalqımızın potensialı tarixi ədalətin bərpası üçün səfərbər edilmişdir. Ümummilli Liderin şah əsəri olan güclü Azərbaycan dövləti öz suverenliyini, müstəqilliyini qorumağa qadir olduğunu 44 günlük Vətən müharibəsində şanlı Zəfər qazanmaqla sübuta yetirmişdir”.

 

Tədbirdə çıxış edənlər dahi şəxsiyyət Heydər Əliyevin ölkəmizin inkişafı naminə göstərdiyi əvəzsiz xidmətlərdən bəhs ediblər.