Şəki Rayon Mərkəzi Xəstənanasında 8 may - Beynəlxalq Talassemiya Günü ilə əlaqədar tədbir keçirilib.
Bu barədə Aztibb.az-a Xəstəxanadan məlumat verilib.
Tədbiri giriş sözü ilə açan müəssisənin direktoru Məcid Əliyev talassemiya xəstəliyinin formaları, genetik ötürülmə variantları, həmçinin qohum evlilikləri və onun törətdiyi fəsadlar haqqında danışıb.
Sonra çıxış edən həkim-hematoloq Sevil Həmidova bildirib ki, talassemiya irsi hemolitik anemiyadır. Hemoqlobinin polipeptid zəngirinin sintezinin pozulması nəticəsində yaranır. Talessemiya genini bir valideyindən alan şəxs daşıyıcı, hər iki valideyindən olan xəstə olaraq doğulur.
Diqqətə çatdırılıb ki, Azərbaycanda hər 9-10 sakindən biri talassemiya geninin daşıyıcısıdır. Endemik zonalarda isə o cümlədən, bizim rayonda hər doğulan 7-8 uşaqdan biri genin daşıyıcısı olaraq doğulur.
Ölkəmizdə 3500-dən çox talassemiyalı xəstə var. Şəki rayonunda 109 xəstə dispanser qeydiyyatdadır.
Qeyd olunub ki, Heydər Əliyev Fondunun təşəbbüsü ilə Respublika Talassemiya Mərkəzinin yaradılması nəticəsində bu xəstəliyin müalicəsinin müasir səviyyədə təşkili mümkün olmuşdur. Burada sümük iliyi transplantasiyası əməliyyatları da uğurla həyata keçirilir. Xəstələr pulsuz olaraq xelator dərmanlarla təmin olunurlar.
Vurğulanıb ki, Prezident İlham Əliyevin 2015-ci il fevralın 10-da imzaladığı sərəncamında təsdiq etdiyi Talassemiya ilə mübarizəyə dair 2015-2022-ci illər üçün Dövlət proqramı xəstəliyin profilaktikası və müalicəsinin təkminləşməsinə yönəlmişdir. Hər ötən 5 illikdən sonra bu sahədə görülən işlərin nə qədər irəlilədiyi aydın görünür. 2015-ci ildən nikaha daxil olanlarda talassemiya daşıyıcılığının yoxlanması xəstə doğulanların sayının əhəmiyyətli dərəcədə azalmasına səbəb olmuşdur.
Bildirilib ki, Mehriban xanım Əliyeva və Leyla xanım Əliyevanın bu xəstələrə xüsusi diqqət ayırması, tez-tez Talassemiya Mərkəzində gedən işlərlə, xəstələrlə maraqlanması istər hematoloqlarda, istərsə də xəstələrdə ruh yüksəkliyi yaradır.
İcbari Tibbi Sığorta çərçivəsində bu xəstələrə diqqət daha da artırılmış, lazım olan bütün müayinələr Xidmətlər zərfinə daxil edilmişdir.
Şəki Rayon Mərkəzi Xəstəxanasında və Milli Hemotologiya və Trasfliziologiya Mərkəzinin Şəki filialında Şəki və ətraf rayonlarda yaşayan talassemiyalı xəstələrə yüksək səviyyədə xidmət göstərilir.