Azərbaycan Respublikasında 2023-cü ilin "Heydər Əliyev İli" elan edilməsi ilə əlaqədar olaraq Şəmkir Rayon Mərkəzi Xəstəxanasının tabeliyində fəaliyyət göstərən Zəyəm Ailə Sağlamlıq Mərkəzinin həkimləri tərəfindən Şəmkir Rayon Əhməd Cəmil adına Zəyəm qəsəbə tam orta məktəbində uşaqlar arasında dispanserizasiya həyata keçirilib.

Bu barədə Aztibb.az-a Şəmkir Rayon Mərkəzi Xəstəxanasından məlumat verilib.

Uşaqların dispanserizasiyası uşaqların sağlamlığının qorunması, onların normal fiziki inkişafının təmin edilməsi və xəstəliyin ilkin mərhələdə aşkar edilməsi məqsədilə kompleks profilaktika, diaqnostika və müalicə-sağlamlaşdırıcı tədbirlərdən ibarət olan aktiv dinamik müşahidə sistemidir. Xəstəliklərin və əlillik hallarının əksəriyyətinin təməlinin uşaq yaşlarında qoyulduğunu nəzərə alaraq, uşaqlar arasında xəstəliklərə səbəb olan risk faktorlarının aşkar edilməsi və qarşısının alınması, kəskin və xroniki xəstəlikləri olan uşaqların erkən aşkar edilməsi, onların müalicəsi və nəzarətə götürülməsi məqsədilə icbari tibbi müayinələrin, aşkar edilmiş xəstə uşaqların dispanserizasiyaya cəlb edilməsinin və müalicə-sağlamlaşdırıcı tədbirlərin həyata keçirilməsinin müstəsna əhəmiyyəti vardır.